तळोदा : पुणे येथील विवाहितेस आत्महत्येस प्रवृत्त करणाऱ्या तिच्या कुटुंबातील पती, सासू व सासरे याची चौकशी होवून दोषी आरोपींना कठोर शिक्षा व्हावी या मागणीसाठी तळोदा येथे क्षत्रिय मराठा समाजाच्या वतीने तहसीलदार गिरीश वाखारे यांना निवेदन देण्यात आले.
या निवेदनात म्हटले आहे की, १७ जून २०२१ रोजी सासू-सासऱ्यांचा मानसिक, शारीरिक छळाला व विकृतीला कंटाळून विवाहिता साक्षी अमित शिंदे या युवतीने नाशिक येथे आत्महत्या करून आपले जीवन संपवले आहे. साक्षी हीचा विवाह ५ फेब्रुवारी २०१८ रोजी नंदुरबार येथे पार पडला होता. मात्र सासरवासीयांकडून वेळोवेळी तिचा मानसिक व शारीरिक छळ होत होता. शेवटी छळाला कंटाळून तीने आत्महत्या केली. साक्षीला आत्महत्या करण्यास प्रवृत्त केले म्हणून सासरे एकनाथ विठ्ठल शिंदे, सासू सीमा एकनाथ शिंदे, पती अमित एकनाथ शिंदे सर्व राहणार मोड, ता.तळोदा, जिल्हा नंदुरबार, हल्ली मुक्काम अष्टविनायक कॉलनी वाडा रोड राजगुरुनगर जिल्हा पुणे यांच्याविरुद्ध नाशिक येथील अंबड पोलीस ठाण्यात गुन्हा दाखल करण्यात आलेला आहे. समाजातील अशा प्रकारे नवविवाहितांचा छळ करून त्यांना आत्महत्येस प्रवृत्त करणाऱ्या घातक प्रवृत्तीला आळा बसावा शिवाय त्यांच्यावर कायद्याचा वचक राहावा म्हणून या प्रकरणाची संबंधित यंत्रणेकडून सखोल चौकशी करण्यात येवून दोषींना कठोर शिक्षा मिळावी. जेणेकरून समाजात चांगला संदेश जाऊ शकतो. तसेच समाजात अशी वाईट वर्तणूक सहन करत असलेल्या महिलांच्या अत्याचाराला ही आळा बसू शकेल. पर्यायाने भविष्यात अशा वाईट घटना घडू नयेत म्हणून उपरोक्त प्रकरणी दोषींना शिक्षा देऊन न्याय मिळवून द्यावा. अशी मागणी क्षत्रिय मराठा समाजाच्या वतीने करण्यात आली आहे. या निवेदनावर नवनीत शिंदे, महेंद्र गाढे, शांताराम गायकवाड, दिलीप जगदाळे, चुडामण मराठे, मोहन पोटे, मधुकर पवार, विनोद चव्हाण, अशोक चव्हाण, गणेश मराठे, खुशाल शिंदे, सुभाष शिंदे, संजय बोराणे, विश्वनाथ बोराणे, युवराज चव्हाण, नरेंद्र मराठे, विनोद मराठे, गणेश मराठे, चंद्रकांत मराठे, सुनील मराठे, जगन्नाथ मराठे, प्रभाकर उगले, दिनेश शिंदे, नीलेश चव्हाण, जगदीश बोर्डे, संजय बोडे, संजय गाढे आदींच्या स्वाक्षऱ्या आहेत.