अक्कलकुवा तालुक्यातील ओढी येथे ४६ शेळ्यांचा मृत्यू

लोकमत न्यूज नेटवर्कवाण्याविहीर : अक्कलकुवा तालुक्यातील व सातपुड्याच्या डोंगराळ भागातील ओढी येथे  १ ते २४ जानेवारीदरम्यान आठ शेळ्यांचा मृत्यू झाला होता. यासंदर्भात पोलीस पाटील नानसिग वसावे यांनी स्थानिक पशुवैद्यकीय अधिकाऱ्यांशी संपर्क साधून ही माहिती दिली होती.  त्यानंतरदेखील परिस्थिती मात्र तशीच होती व आजारी शेळ्यांच्या संख्येत व मृत शेळ्यांच्या संख्येतदेखील सतत वाढ होत राहायची म्हणून पशुपालक व पोलीस पाटीलांनी तहसीलदार व पशुवैद्यकीय अधिकाऱ्यांना २५ जानेवारी रोजी निवेदन दिले होते. त्यानंतर २७ जानेवारी रोजी पशुवैद्यकीय अधिकाऱ्यांनी शेळ्यांवर औषधोपचार केले. पुन्हा २९ जानेवारी ते २ फेब्रुवारीदरम्यान पुन्हा सहा शेळ्या दगावल्याने पोलीस पाटील नानसिग वसावे यांनी पशुवैद्यकीय अधिकाऱ्यांना माहिती देत औषधोपचार करण्याची मागणी केली होती. यानंतर पुन्हा कर्मा वसावे यांच्या एका शेळीचा मृत्यू झाला तर ४ जानेवारी रोजी उरशा वसावे यांच्या एका शेळीचा मृत्यू झाला होता.  तसेच वंदना वसावे, किशोर वसावे, गोविंद वसावे, गंगाबाई वसावे, गिंबल्या वसावे यांच्या प्रत्येकी एक व उरशा वसावे आणि कर्मा वसावे यांच्या प्रत्येकी पाच, माकत्या वसावे यांच्या सहा, दिलीप वसावेंच्या आठ, ओल्या वसावेंच्या १४, अशा १ जानेवारी ते ४ फेब्रुवारीदरम्यान ४६ शेळ्या दगावल्याने पशुपालकांचे अंदाजे दोन लाख ८८ हजार रुपयांचे नुकसान झाले आहे. या  मृत झालेल्या पशुपालकांना नुकसानभरपाई द्यावी, अशी मागणी पशुपालकांकडून करण्यात येत आहे.