उमरी : शहरातील नागरिकांना योग प्राणायामचे धडे देऊन त्यांचे आरोग्य सुधारण्याच्या दृष्टीने मार्गदर्शन करणारे योगशिक्षक पंडितराव बेंबरे यांचा सर्व योग साधकांच्यावतीने सत्कार करण्यात आला.
दररोज पहाटे गोरठा रस्त्यावरील आनंदीधाम येथील प्रशस्त मैदानावर पंडितराव बेंबरे हे उमरी शहरातील नागरिकांकडून योग, प्राणायाम व विविध प्रकारची आसने यांचा सराव नियमितपणे करून घेतात. वयाची ६८ वर्षे पूर्ण झालेली असताना तसेच हृदयविकारासह अन्य पाच शस्त्रक्रिया झालेल्या असतानाही बेंबरे हे आजही सुदृढ, निरोगी व उत्साही आयुष्य जगत आहेत. योग प्राणायाम यांच्या नियमित सरावाने त्यांनी आरोग्यविषयक गंभीर आजारांना पळवून लावले आहे. स्वतःचे उदाहरण देत ते अनेकांना योग व प्राणायामचे धडे देत आहेत. त्यामुळेच अनेक नागरिकांचे मधुमेह, हृदयाचे विकार, किडनीविषयक आजार, सांधेदुखी, डोळ्यांचे आजार या व्याधी कमी झाल्या आहेत. निरोगी व आनंदमयी जीवन जगण्याचा उत्तम मार्ग योग, प्राणायाम असल्याचे बेंबरे यांनी यावेळी सांगितले.
बेंबरे हे दररोज पहाटे नागरिकांना जमवून प्राणायाम तसेच योग साधनेचे धडे देत असल्याने या सर्व योग साधकांच्यावतीने त्यांचा शाल, श्रीफळ व पुष्पहार घालून सत्कार करण्यात आला. यावेळी माजी नगरसेवक किशनराव रॅपनवाड, गंगाधर पाटील पुयड, गणेशराव चव्हाण, दिलीपराव पाटील, साहेबराव शिंदे-बोळसेकर, केदार चिटमलवार, बालाजीराव माचेवाड, श्रीनिवास अनंतवार, राम पाटील-तोडे, गोपाळ पंडित, व्ही. व्ही. कदम, बाळासाहेब जाधव, सुभाष पाटील-ढगे, विक्रम सोळंके, गोविंद ढगे, बालाजी चव्हाण, बालाजी गाढे, सतीश हंबर्डे आदी उपस्थित होते.