पबजी खेळावरून मित्रांमध्ये वाद
शहरातील पिवळी बिल्डिंग परिसरात पबजी खेळत असताना मित्राने शिवीगाळ केल्यानंतर मारहाणीची घटना घडली. आयानखान अकबरखान पठाण हा तरुण मित्रासोबत पबजी खेळत बसला होता. यावेळी आरोपीने या ठिकाणी बसू नको, म्हणत शिवीगाळ केली. त्यावरून वाद झाला. या प्रकरणात इतवारा पोलीस ठाण्यात गुन्हा नोंदविण्यात आला आहे.
अपघातात दोन तरुणांचा मृत्यू
नांदेड ग्रामीण आणि हदगाव पोलीस ठाण्याच्या हद्दीत दोन वेगवेगळ्या अपघातांत दोन तरुणांचा मृत्यू झाला आहे. या प्रकरणात संबंधित पोलीस ठाण्यांत गुन्हा नोंदविण्यात आला आहे.
शहरातील दूध डेअरी चौक भागातून शेख शोयब शेख कलीम हा तरुण त्याच्या मित्रासोबत एमएच २६, एडब्ल्यू ८७८२ या क्रमांकाच्या दुचाकीवरून सिडको ते नावघाटकडे जात होता. दूध डेअरी चौक परिसरात त्यांची दुचाकी आलेली असताना एमएच १४, एएचयू १४६२ या क्रमांकाच्या ट्रकने भरधाव वेगाने यांच्या दुचाकीला धडक दिली. ही घटना ६ जून रोजी घडली. या अपघातात शेख शोयब याचा मृत्यू झाला. या प्रकरणात नांदेड ग्रामीण ठाण्यात ट्रक चालकाविरोधात गुन्हा नोंद झाला,
तर हदगाव ते उमरखेड रस्त्यावर वाहनाला ओव्हरटेक करण्याच्या प्रयत्नात असलेल्या तरुणाचा मृत्यू झाला. शुभम साहेबराव कदम रा. कारखेड, ता. उमरखेड हा तरुण एमएच २९, बीके ९३३७ या क्रमांकाच्या दुचाकीवरून श्रीनिवास पेट्रोल पंप येथे पेट्रोल टाकून परत येत असताना समोरील वाहनाला ओव्हरटेक करण्याच्या प्रयत्नात त्याचा वाहनाला धक्का लागला. त्यामुळे तोल जाऊन खाली पडला. या अपघातात जखमी झालेल्या शुभमचा उपचारादरम्यान मृत्यू झाला.