कल्याणकरांचे सदस्यत्व रद्द करण्याच्या निर्णयास स्थगिती

नांदेड महापालिकेच्या सार्वत्रिक निवडणुकीत प्रभाग क्रमांक १ ड मधून बालाजी कल्याणकर हे केवळ दोन मतांनी विजय झाले होते. या निकालास त्यांचे प्रतिस्पर्धी दिनेश मोरताळे यांनी न्यायालयात आव्हान दिले होते. त्यामुळे फेरमतमोजणी करण्यात आली. उपविभागीय अधिकाऱ्यांच्या उपस्थितीत झालेल्या पोस्टल मतांच्या मोजणीचा अहवाल न्यायालयाला पाठविल्यानंतर आणि त्यानंतरच्या सुनावणीनंतर ६ मार्च रोजी बालाजी कल्याणकर यांचे सदस्यत्व रद्द करण्याचा निर्णय दिवाणी न्यायालयाने दिला होता. त्यांचे प्रतिस्पर्धी काँग्रेसचे दिनेश मोरताळे यांना या निकालात विजयी घोषित करण्यात आले होते. त्यानंतर या निर्णयास आव्हान दिले. त्या वेळी दिवाणी न्यायालय वरिष्ठ स्तर येथील न्यायाधीश रवींद्र करंकाळ यांनी कल्याणकर यांना वरिष्ठ न्यायालयात या निर्णयास आव्हान द्यायचे असल्याने सदर निर्णयाची अंमलबजावणी अपिलाधीन कालावधीपर्यंत स्थगित करण्याचा निर्णय दिला आहे.