दिवसा वीजपुरवठा करा
पळशी - विद्युत महावितरण कंपनीच्या वतीने दिवसा वीजपुरवठा बंद ठेवून रात्रीच्या वेळेस पुरवठा करण्यात येत आहे. त्यामुळे शेतकऱ्यांना पिकांना पाणी देण्यासाठी रात्री शेतात जावे लागत आहे. त्यामुळे शेतीसाठी दिवसा वीजपुरवठा करण्याची मागणी या भागातील शेतकऱ्यांनी केली आहे.
कोविड योद्धयांचा गौरव
बामणीफाटा - कोरोना काळात उत्कृष्ट कार्य करणाऱ्या व्यक्तींचा २४ डिसेंबर रोजी चिंचगव्हाण येथे एका कार्यक्रमात गौरव करण्यात आला. यावेळी शाळेचे मुख्याध्यापक आय.जी.बेग व चंद्रे यांच्या हस्ते पुरस्कारप्राप्त व्यक्तींना प्रमाणपत्र देण्यात आले. यामध्ये इस्माईल पिंजारी, हरिश्चंद्र चिल्लोरे, प्रेमराव भूतनर, लक्ष्मण लोमटे, संतोष मस्के आदींचा समावेश आहे.
मोकाट जनावरांचा त्रास
नांदेड - सिडको भागातील रुग्णालय व नागरी वस्त्यांमध्ये मोकाट जनावरांचा त्रास वाढला आहे. याठिकाणी घाणीचे साम्राज्य असून त्यामुळे मोकाट जनावरे या ठिकाणी एकत्र येत आहेत. या घाणीमुळे नागरिकांच्या आरोग्यावरही परिणाम होत आहे. या जनावरांचा बंदोबस्त करण्याची मागणी या भागातील नागरिकांनी केली आहे.
प्लास्टिक बॅगचा वापर
धर्माबाद - शहरात मोठ्या प्रमाणावर प्लास्टिकचा वापर नागरिक करत असून त्यामुळे प्लास्टिक कचऱ्याची समस्या निर्माण झाली आहे. प्रशासनाने कॅरी बॅगवर बंदी घातली असली तरी नागरिक त्याचा सर्रास वापर करताना आढळून येत आहे. याकडे लक्ष देण्याची मागणी पर्यावरणप्रेमींनी केली आहे.
मारतळ्यात नेत्यांची प्रतिष्ठा पणाला
मारतळा - मारतळा परिसरातील अनेक गावांत ग्रामपंचायत निवडणुकीची चर्चा सुरू असून अनेक नेत्यांची प्रतिष्ठा या निवडणुकीत पणाला लागणार आहे. परिसरातील कापसी बु., वाळकी खुर्द, डोनवाडा, कापसी खु., वाळकी खु., डोलारा, गोळेगाव, सुगाव, धनज खु., पिंपळदरी, कामळज, जोमेगाव या ठिकाणी निवडणुका होणार आहेत.