दोन लाखांसाठी छळ
कंधार - तालुक्यातील गोगदरी येथे विवाहितेचा माहेराहून २ लाख रुपये आणण्यासाठी छळ केल्याच्या आरोपावरून पोलिसांनी गुन्हा नोंद केला. २८ वर्षीय विवाहितेने फिर्याद दिली. पोलीस उपनिरीक्षक मांगूळकर तपास करीत आहेत.
कविता संग्रहाचे प्रकाशन
किनवट - येथील रामजी कांबळे यांच्या पाच कविता संग्रहाचे प्रकाशन ३ जानेवारी रोजी होणार आहे. कार्यक्रमाला बौद्ध महासभेचे तालुकाध्यक्ष प्रशांत ठमके, राष्ट्रीय सरचिटणीस डॉ.अशोक गायकवाड, गझलकर मधु बावलकर, भीमराव हाटकर, डॉ.अंबादास कांबळे, ॲड.मिलींद सप्रे, महेंद्र नरवाडे, उत्तम कानिंदे, रमेश मुनेश्वर आदींची उपस्थिती राहणार आहे.
दत्तनामाचा गजर
अर्धापूर - शहरासह तालुक्यात दत्तजयंती सोहळा मंगळवारी उत्साहात साजरा करण्यात आला.दत्त भक्तांची यावेळी मोठी गर्दी झाली होती. अर्धापुरातील बालाजी मंदिर, विठ्ठल मंदिर, किशनबापू आश्रमात दत्तजयंती सोहळा घेण्यात आला. तसेच देळुब, पार्डी, मेंढला, लोन आदी ठिकाणीही सोहळा पार पडला. मंदिरांना फुलांनी सजविण्यात आले होते.
साधेपणाने दत्तजयंती
हदगाव - कोरोनाच्या पार्श्वभूमीवर तामसा येथे साधेपणाने दत्तजयंती साजरी करण्यात आली.दत्त मंदिरात अशोक कोडगीरवार यांच्या हस्ते श्रीला अभिषेक करण्यात आला. दुपारी दत्त जन्माचा पाळणा होऊन आरती झाली. यावेळी प्रकाश देशमुख, अमृता वारकड यांनी मार्गदर्शन केले. रात्री किशन महाराज वेणीकर यांच्या हस्ते महापूजा झाली.
हरभऱ्याचा पेरा वाढला
मुक्रमाबाद - मुक्रमाबाद परिसरातील शेतकऱ्यांनी रब्बी हंगामात हरभरा पिकांची मोठ्या प्रमाणात पेरणी केली. थंडीचे वातावरण हरभरासाठी पोषक ठरत असल्याने शेतकरी हरभराकडे वळले होते.
दोन हायवा जप्त
लोहा - लोहा महसूल प्रशासनाने २८ डिसेंबर रोजी कारवाई करत दोन हायवा टिप्पर जप्त केले. तहसीलदार विठ्ठल परळीकर यांनी ही कारवाई केली. एक हायवा टिप्पर लोहा तहसीलमध्ये तर दुसरा सोनखेड पोलीस ठाण्यात लावण्यात आला आहे.या कारवाईत मंडळ अधिकारी कटारे, मारोती कदम, कांबळे, जाधव यांचा सहभाग होता.
तालुकाध्यक्षपदी चव्हाण
धर्माबाद - भाजपा किसान मोर्चाच्या धर्माबाद तालुकाध्यक्षपदी कृषी उत्पन्न बाजार समितीचे माजी उपसभापती पिराजी पाटील चव्हाण यांची निवड झाली. जिल्हाध्यक्ष बाबुराव केंद्रे, ग्रामीण जिल्हाध्यक्ष व्यंकटराव गोजेगावकर यांनी त्यांना नियुक्तीपत्र दिले. यावेळी माजी खा.भास्करराव पाटील खतगावकर, महानगराध्यक्ष प्रवीण साले, महिला आघाडीच्या चित्रा गोरे, बाबुराव केंद्रे, रवींद्र पोतगंटीवार, तालुकाध्यक्ष रामचंद्र पाटील, संजय पाटील आदी उपस्थित होते.
वायर लंपास
हदगाव - तालुक्यातील बोरगाव-हस्तरा येथील ११ केव्हीच्या पोलवरील ४०० फुट तार चोरट्यांनी लांबविल्याची घटना २३ डिसेंबरच्या रात्री घडली. २४ डिसेंबर रोजी ही घटना उघडकीस आली. तारेची किंमत ४ हजार रुपये होती अशी फिर्याद सहाय्यक अभियंता संजय महनूर यांनी पोलिसात दिली. पोलीस उपनिरीक्षक सावंत तपास करीत आहेत.
विवाहितेचा छळ
अर्धापूर - तालुक्यातील डौर येथील विवाहितेने माहेराहून दोन लाख रुपये आणण्यासाठी तिचा छळ केल्याच्या आरोपावरून पोलिसांनी सासरच्या मंडळीविरूद्ध गुन्हा नोंदविला. तू चांगली राहत नाहीस, तुझे वागणे चांगले नाही, तुला स्वयंपाक करता येत नाही असे म्हणून आरोपी छळ करीत होते, अशी फिर्याद पिडीतेने अर्धापूर पोलिसात दिली.