साने गुरुजी जयंती
बिलोली - तालुक्यातील अर्जापूर येथे जयराम अंबेकर विद्यालयात साने गुरुजी जयंती साजरी करण्यात आली. कार्यक्रमाला सुभाष देगलूरकर, सतीश जोशी, विजय गायकवाड यांची उपस्थिती होती. यावेळी मान्यवरांनी साने गुरुजी यांच्या जीवनावर प्रकाश टाकणारी भाषणे केली. प्रास्ताविक व सूत्रसंचालन पवार यांनी केले. यावेळी कडलवार, ढगे, भालके, मुंगडे, गंगा पापूलवार, बाबू शेख आदी उपस्थित होते.
कर्मचाऱ्यांचे प्रशिक्षण
लोहा - ग्रामपंचायत निवडणुकीच्या अनुषंगाने लोहा तालुक्यातील निवडणूक कर्मचाऱ्यांचे प्रशिक्षण पार पडले. प्रशिक्षण तहसीलदार विठ्ठल परळीकर, नायब तहसीलदार राम बोरगावकर यांनी दिले. प्रशिक्षणासाठी नायब तहसीलदार देवराय, अशोक मोकले, तिरुपती मुंगरे, अव्व्ल कारकून बडवणे, संगणक तज्ज्ञ गिरी, प्रशांत अपशेटे, सूर्यकांत पांचाळ आदींनी परिश्रम घेतले.
प्रशासन मतदार केंद्रावर
हदगाव - तालुक्यासह बरडशेवाळा, पळसा, मनाठा परिसरात ग्रामपंचायत निवडणूक पार पडत आहे. निवडणुकीच्या पार्श्वभूमीवर तलाठी, झोनल ऑफीसर यांच्याकडून शाळा, अंगणवाडी, मतदान केंद्र असलेल्या ठिकाणी औषध सुविधा आहेत का याची माहिती घेतली जात आहे. निवडणूक निर्णय अधिकारी जीवराज डापकर यांच्या मार्गदर्शनाखाली कर्मचारी परिश्रम घेत आहेत.
रासेयोच्या वतीने स्वच्छता
अर्धापूर - शंकरराव चव्हाण महाविद्यालयातील राष्ट्रीय सेवा योजना विभागाच्या वतीने २५ डिसेंबर रोजी स्वच्छता मोहीम राबविण्यात आली. यावेळी अध्यक्ष प्रवीण देशमुख, व्यंकटी राऊत, तानाजी मेटकर, गोरखनाथ राऊत, शरद पतंगे आदी उपस्थित होते.
गव्हाचे पीक बहरले
लोहा - लोहा तालुक्यात गहू, हरभरा या पिकांना सध्या पोषक वातावरण निर्माण झाले. बेन्नाळ परिसरात गव्हाचे पीक चांगलेच बहरल्याने शेतकऱ्यांत समाधान व्यक्त होत आहे. सध्या मुबलक पाणी व पोषक वातावरण असल्याने गव्हाला ज्वर आला आहे.
वाळुची खुलेआम तस्करी
कंधार - तालुक्यात ठिकठिकाणी वाळूची तस्करी सुरू आहे. नूतन तहसीलदार व्यंकटेश मुंडे यांनी याकडे लक्ष देण्याची गरज आहे.वाळू तस्करीमुळे शासनाचे मोठे नुकसान होत आहे.अप्रत्यक्षरित्या महसूल प्रशासनाचे वाळू तस्करीला पाठिंबा आहे की काय अशी चर्चा सुरू आहे.
शंभवी गबाळे हिची निवड
मुखेड - शाहीर अण्णा भाऊ साठे महाविद्यालयातील शंभवी बालाप्रसाद गबाळे हिची राष्ट्रीय स्तरावरील विज्ञान प्रदर्शन व प्रकल्प स्पर्धेसाठी निवड झाली. सौर उर्जेवर ठीबक सिंचन या प्रयोगाचे ती प्रदर्शन करणार आहे. शंभवी ही१०वीत शिकणारी आहे. या यशाबद्दल प्राचार्य डॉ.मनोहर तोटरे, पी.एम. कोयले, ए.सी.जाधव आदींनी तिचे स्वागत केले.
दत्त मूर्ती प्रतिष्ठापणा
धर्मबाद - तालुक्यातील मौजे पाटोदा (थडी) येथे दत्त मंदिराचा कलशारोहण कार्यक्रम व मूर्ती प्राणप्रतिष्ठा कार्यक्रम पार पडला. यानिमित्ताने विविध कार्यक्रम घेण्यात आले. कार्यक्रमाला जि.प.सदस्य पूनम पवार, बाजार समितीचे संचालक रमेश गौड, सतीश मोटकुल यांची उपस्थिती होती. रत्नाळी येथेही द्रौपदी माता मंदिराच्या मूर्ती प्राणप्रतिष्ठेचा कार्यक्रम पार पडला.