अनुसूचित जाती जमाती चार हजार :,ओबीसी आठ-दहा हजार
हदगाव : ग्रामपंचायत निवडणुका लढविणाऱ्या उमेदवारांची कागदपत्रे जमविण्यासाठी दमछाक होत असून कागदपत्राचे महत्व ओळखून महसूल विभागात प्रमाणपत्राचे भाव वाढले आहेत.
तालुक्यात १०८ ग्रामपंचायत निवडणूक रिंगणात आहेत त्यापैकी ४८ सरपंच ओबीसीचे होणार आहेत. २६ एस्सी व १३ आदिवासी त्यामुळे ज्या इच्छुक उमेदवाराकडे जातप्रमाणपत्र, जातवैधता प्रमाणपत्र नाहीत ते तत्काळ प्रमाणपत्रे काढण्यासाठी धडपड करीत आहेत. त्यासाठी वाटेल ती किंमत मोजायला तयार आहेत या संधीचा फायदा महसूल विभाग उचलायला तयार आहे. गावातील सेतू केंद्रापासून नायब तहसीलदारापर्यंत हे जाळे पसरले आहे.
अनुसूचित जातीचे प्रमाणपत्र शंभर दोनशे रुपयांत काढून देणारे चार हजार रु मागणी करीत आहेत. तर ओबीसीसाठी आठ ते दहा हजार रु मोजावे लागत आहेत.
मनाठा येथील एका उमेदवाराने संपूर्ण कागदपत्रे जुळवून जातप्रमाणपत्र संचिका तयार केली गावातील सेतू चालकास आठ हजार रु ठरले.
याच सेतू चालकाने विरोधकास ही माहिती दिली. त्याने राजकीय वजन वापरुन ते प्रमाणपत्र थांबविले. यामुळे उमेदवार भडकला सेतू चालकास जातप्रमाणपत्र दे अथवा दिलेले पैसै परत कर अशी मागणी केली सेतू चालकाने हात वर केले. मी साहेबांना पैसे दिल्याचे सांगितले आता ते कोण साहेब यांची चौकशी सुरू आहे.
ओबीसी प्रमाणपत्रासाठी योग्य कागदपत्रे दिल्यास जातप्रमाणपत्र देण्यास अडचण नाही, पण आमदारांनी फोन केल्यामुळे तहसीलदार चक्रावले आहेत गावपातळीवरील राजकारण कोणत्या थराला जाईल सांगता येत नाही.
पण काही असो कोरोनामुळे अडचणीत आलेले एकूण व्यवसायाला चांगले दिवस आले आहेत. ऑनलाईन आवेदनपत्र भरण्यासाठी एक हजार रुपये मोजावे लागत आहेत वरती भरवशाचा संगणक चालक भेटला तर बरा नाहीतर त्रुटीत अर्ज येण्याची धास्ती वेगळीच.