उमरी तालुक्यातील जामगाव येथील घटना
लोकमत न्यूज नेटवर्क
उमरी : महिंद्रा रुरल हाऊसिंग फायनान्स कंपनीकडे बनावट कागदपत्रे तयार करून १३ लाख ९२ हजारांची फसवणूक केल्या प्रकरणातील उमरी तालुक्यातील जामगाव येथील सर्व १९ आरोपी फरार असून पोलिस त्यांचा कसून तपास करीत आहेत.
नमूना क्रमांक आठ , आधार कार्ड , रजिस्ट्री आदी कागदपत्रे सादर करुन बनावट सही व शिक्का वापरुन कंपनीची १३ लाख ९२ हजार ४८५ रुपयांची फसवणूक केल्याप्रकरणी या प्रकरणात उमरी पोलिस ठाण्यात उमरी तालुक्यातील जामगाव येथील १९ जणांविरुद्ध गुन्हा नोंदविण्यात आला आहे. महिंद्रा रुरल हाऊसिंग फायनान्स कंपनीकडे कर्ज मिळविण्यासाठी जामगाव ता. उमरी येथील काही जणांनी अर्ज केला होता. या अर्जासोबत बनावट कागदपत्रे तयार केली. नमुना क्रमांक आठ बनावट तयार करण्यात आले. त्यावर ग्रामसेवकाची स्वाक्षरी आणि खोटे शिक्के मारण्यात आले होते. दुय्यम निबंधक कार्यालयात गहाण खत तयार करून त्याद्वारे १९ जणांनी तब्बल १३ लाख १२ हजार ४८५ रुपये कर्ज घेतले. पंरतु नंतरच्या काळात फायनान्सच्या तपासणीत दाखल केलेली सर्व कागदपत्रे ही बनावट असल्याचे उघडकीस आले. सर्व कर्जदारांनी कंपनीची फसवणूक केली. असे प्रथमदर्शनी तपासात समोर आले आहे. यामध्ये आरोपींची संख्या वाढ होण्याची शक्यता आहे . या प्रकरणात कंपनीचे व्यवस्थापक मिलिंद सेलूकर यांनी पोलिस ठाण्यात दिलेल्या तक्रारीवरुन १९ जणांविरुद्ध फसवणुकीचे गुन्हे दाखल करण्यात आले आहेत. उमरी पोलिसांनी रविवारी या प्रकरणातील काही आरोपींकडून याबाबत अधिक माहिती घेण्याचा प्रयत्न केला . त्यावेळी सदर प्रकरणी आम्हाला कसलीच माहिती नसल्याचे सांगून आम्ही महिंद्रा फायनान्स कंपनी कडून काहीच पैसे घेतले नसल्याचे सांगितले. हा सर्व प्रकार आमच्या परस्पर झाल्याचे त्यांनी सांगितले. या सर्व प्रकारामुळे सदरील फसवणूकीचे प्रकरण बरेच गुंतागुंतीचे होण्याची शक्यता वर्तविली जात आहे. उमरी तालुक्यातील अनेक गावांमध्ये अशाच प्रकारे पैसे उचलून कंपनीची फसवणूक केल्याचे आता समोर येत आहे. त्यामुळे संगनमताने अनेक लोकांनी मिळून कंपनीची फसवणूक केल्याचे सांगण्यात आले. या प्रकरणाचा पुढील तपास पोलीस निरीक्षक दत्तात्रय निकम यांच्या मार्गदर्शनाखाली सहाय्यक पोलिस निरीक्षक आर.टी. शेवाळे हे करीत आहेत.