गडगा : ग्रामपंचायत सार्वत्रिक निवडणुकीच्या रिंगणात उतरणाऱ्या इच्छुक उमेदवारांची बँकेत खाते उघडण्यासाठी गडगा येथील महाराष्ट्र ग्रामीण बँक शाखेत सोमवारी मोठ्या प्रमाणावर गर्दी झाल्याचे चित्र पाहावयास मिळाली. दरम्यान, निवडणूकपूर्व हालचाली सुरू झाल्या असून, कडाक्याच्या थंडीतही ग्रामीण भागात राजकीय वातावरण तापले आहे.
निवडणूक आयोगाने दिलेल्या निर्देशानुसार ग्रामपंचायत निवडणूक लढविण्यासाठी इच्छुक उमेदवारांना बँकेत निवडणूक खर्चाचे स्वतंत्र खाते उघडणे बंधनकारक आहे. ग्रामपंचायत निवडणुकीसाठी नामनिर्देशनपत्र दाखल करण्यासाठी दोन दिवसांचा अवधी शिल्लक आहे. त्यामुळे निवडणूक रिंगणात उतरणाऱ्या उमेदवारांनी महाराष्ट्र ग्रामीण बँकेच्या गडगा शाखेत सोमवारी सकाळपासूनच मोठ्या प्रमाणावर गर्दी केली होती. दुपारच्या वेळी बँकेला भेट दिली असता बँकेचे व्यवस्थापक, सहायक व्यवस्थापक, रोखपाल, बँकेचे सारथी ही सर्व मंडळी कामात मग्न होती. त्यातच प्रधानमंत्री शेतकरी सन्मान योजनेचे अनुदान काढण्यासाठी शेतकरीही मोठ्या संख्येने आले होते. सलगपणे तीन दिवस बँकांना सुटी होती. त्याचाही परिणाम गर्दीच्या रूपात दिसून आला.
किनवट तालुक्यातील २६ ग्रामपंचायतींसाठी तिसऱ्या दिवशी २८ उमेदवारी अर्ज दाखल; मंगळवारी व बुधवारी होणार गर्दी
किनवट : तालुक्यातील २६ ग्रामपंचायतींच्या सार्वत्रिक निवडणुकीसाठी उमेदवारी अर्ज दाखल करण्याची प्रक्रिया सुरू असून, उमेदवारी अर्ज दाखल करण्यासाठी केवळ दोन दिवस उरले असतानाही उमेदवारी अर्ज दाखल करण्याच्या तिसऱ्या दिवशी २६ ग्रामपंचायतींचे २८ अर्ज दाखल झाले आहेत. आजपर्यंत ४१ नामनिर्देशनपत्रे दाखल झाली आहेत, अशी माहिती निवडणूक सूत्राने दिली.
तालुक्यातील २६ ग्रामपंचायतींच्या ८२ प्रभागांच्या २२० जागांसाठी निवडणूक होत आहे उमेदवारी अर्ज दाखल करण्याची शेवटची तारीख ३० डिसेंबर असताना व सोमवार हा शुभ दिवस असतानाही सोमवारी केवळ २६ ग्रामपंचायतींचे २८ नामनिर्देशनपत्रे दाखल झाली आहेत. मंगळवार आणि बुधवार या दोन दिवसांत मोठे अर्ज दाखल होतील, असे काहीसे चित्र आहे.