लोकमत न्यूज नेटवर्क
नागपूर - कोरोनाचा झपाट्याने प्रादुर्भाव होत असताना आपल्या घरात दारू आणि हुक्का पार्टी करत आरडाओरड करणाऱ्या पाच तरुण तसेच त्यांच्या आठ मैत्रिणींना अंबाझरी पोलिसांनी ताब्यात घेतले. दारूच्या नशेत झिंगाट झालेली या मंडळींनी शनिवारी मध्यरात्रीनंतर अंबाझरी पोलीस ठाण्याच्या हद्दीतील वर्मा ले-आऊट परिसरातील नागरिकांचा ताप वाढवला होता. रविवारी पहाटे अंबाझरी पोलिसांचे पथक गस्त करीत असताना त्यांना एका घरातून मोठमोठ्याने किंचाळणे, आरडाओरड ऐकू आली. त्यामुळे पोलिसांनी त्या घराचे दार ठोठावले. मात्र, आतमधील मंडळी सैराट होती. त्यांनी सुमारे अर्धा तास दार ठोठावूनही पोलिसांना दाद दिली नाही. त्यामुळे पोलिसांनी बाजूच्या दाराने घरात प्रवेश केला. यावेळी तेथे कुशल संजय श्रीवास्तव (वय २८, रा.वर्मा ले-आऊट अंबाझरी), सागर अरुण बोडखे (वय २६, रा.गोदरेज आनंदम गणेशपेठ), धृव अजय शर्मा (वय २५, रा.शेल्टररिजेन्सी, नेल्सन चाैक) देव कन्वररंजित सबरवाल (वय २९, रा. डागा ले-आऊट) आणि अभिषेक अशोक धवड (वय २६, रा. जानकीधाम अपार्टमेंट, धंतोली) तसेच त्यांच्या आठ मैत्रिणी गोंधळ घालत दिसले. कोरोनापासून वाचण्यासाठी पोलिसांनी गर्दी टाळण्याचे आवाहन केले असताना ही झिंगाट मंडळी सैराट सारखा डान्स करीत होती. त्यांच्याकडे दारूच्या बाटल्या आणि हुक्का पॉटही आढळले. पोलिसांनी ते जप्त करून उपरोक्त मंडळींविरुद्ध विविध कलमानुसार गुन्हे दाखल केले.
परिमंडळ दोनच्या पोलीस उपायुक्त विनीता साहू, सहायक आयुक्त सुधीर नंदनवार यांच्या मार्गदर्शनाखाली ठाणेदार नरेंद्र हिवरे यांच्या नेतृत्वात पोलीस निरीक्षक राहुल शिरे तसेच त्यांच्या सहकाऱ्यांनी ही कारवाई केली. यावेळी आजूबाजूचे नागरिक मोठ्या संख्येत सैराट मंडळीला बघण्यासाठी गोळा झाली होती.
---
तलवारीने केक कापला
शनिवारी याच पोलीस पथकाने बर्थ डे केक तलवारीने कापून सिनेमातील गुंडासारखा स्वत:चा फोटो सोशल मीडियावर व्हायरल करणाऱ्या प्रवीण शामराव खंडारे (वय३०, रा. जयनगर, अंबाझरी) या गुंडाच्याही मुसक्या आवळल्या. त्याच्याकडून तलवार जप्त करण्यात आली.
---