अभय लांजेवार
उमरेड : वडील, आई, पत्नी आणि भावजय अशा संपूर्ण कुटुंबाची महात्मा गांधी राष्ट्रीय ग्रामीण रोजगार हमी योजनेच्या कामावर ‘हजेरी’ लावत एका रोजगार सेवकाने अपहाराचा कारनामा केल्याची बाब उजेडात आली आहे. उमरेड तालुक्यातील शेडेश्वर या गावामधील हा प्रकार असून रोजगार सेवकाने नियमावलीला वेशीवर टांगत संपूर्ण कुटुंबालाच मनरेगाच्या कामावर दाखविले. अंकुश भाऊराव पाटील असे या ग्रामरोजगार सेवक तथा पाणी पुरवठा कर्मचाऱ्याचे नाव आहे. काही दिवसांपूर्वीच उमरेड तालुक्यातील सोनपुरी येथील मनरेगा भ्रष्ट्राचार प्रकरणाचा कुही पोलीस ठाण्यात गुन्हा दाखल झाला आहे.
उमरेड येथून ३० किलोमीटर अंतरावर असलेल्या शेडेश्वर येथे मनरेगा योजना अंतर्गत विखुरलेले वृक्ष लागवडीचे काम मंजूर झाले होते. २०२१ ला भाग २ मध्ये हे काम करण्यात आले. अशातच मनरेगाच्या या कामावर ग्रामरोजगार सेवक अंकुश पाटील याने कुटुंबातील सदस्यांना कामावर दाखूवन शासनाची दिशाभूल केली. भाऊराव पाटील (वडील), राजस पाटील (आई), मिनाक्षी पाटील (पत्नी) आणि अंजू पाटील (भावजय) अशी कुटुंबीयांची नावे असून ऑनलाईन डिमांड व जमा झालेल्या मजुरी मस्टरच्या नोंदीवरून हा प्रकार उजेडात आला आहे.
मिनाक्षी पाटील यांची या कामावर ६८ दिवस हजेरी लावण्यात आली असून १६,८६४ रुपये असा मोबदला सुद्धा बँकेच्या खात्यात जमा झाला आहे. भाऊराव आणि राजस पाटील यांच्या नावे एकूण ९४ दिवसांची हजेरी आणि २३,३१२ रुपयांची नोंद झाली आहे. अंजू पाटील यांच्या नावाने १०८ दिवसांची हजेरी लावत २६,७८४ रुपये खात्यात जमा झाल्याची नोंद करण्यात आली आहे. २० एप्रिल ते २३ ऑगस्ट २०२१ या चार महिन्यातील हा प्रकार असून या प्रकरणाची तातडीने चौकशी करावी अशी मागणी केली जात आहे.
‘मनरेगाच्या कामात शेडेश्वर येथे भ्रष्ट्राचार झाला, ही बाब सत्य आहे. रोजगार सेवकाने स्वत:च्या कुटुंबातील सदस्यांना कामावर दाखविले. कुटुंबातील सर्व मजुरी मस्टरची रक्कम प्रत्येक खातेदाराच्या सिर्सी येथील एका बँकेत जमा झाली आहे. या प्रकरणाची सखोल चौकशी झाल्यास आणखी काहींची नावे समोर येण्याचीही शक्यता आहे.
भारत थुटे, ग्रामपंचायत सदस्य, सिर्सी, ता. उमरेड
---
काही दिवसांपूर्वीच याबाबतची तक्रार आलेली आहे. चौकशी सुद्धा लावण्यात आली असून चौकशीअंती अहवाल आल्यानंतरच पुढील कारवाईचे पाऊल उचलण्यात येईल.
जयसिंग जाधव
खंडविकास अधिकारी, पंचायत समिती, उमरेड
---