नरखेड : कोरोनाच्या दुसऱ्या लाटेचा सर्वाधिक फटका नरखेड तालुक्याला बसला. ग्रामीण रुग्णालय व प्राथमिक आरोग्य केंद्रात रुग्णांसाठी ऑक्सिजनची पर्याप्त सुविधा नसल्याने अनेकांचा मृत्यू झाला. आजही ते प्रसंग आठवल्यावर अनेकांच्या अंगावर काटा येतो. दुसऱ्या लाटेपासून धडा घेत कोरोनाची तिसरी लाट रोखण्यासाठी व गतवेळसारखी परस्थिती निर्माण झाल्यास रुग्णांना आवश्यक त्या सुविधा उपलब्ध करून देण्यासाठी राज्य सरकारने तालुकास्तरावर ऑक्सिजन निर्मिती प्रकल्प उभे करण्याचा संकल्प केला होता. त्यासाठी स्थानिक आमदारांनी कोविड उपाययोजनेसाठी निधीही उपलब्ध करून दिला होता. कोविड आढावा बैठकीत तत्कालीन जिल्हाधिकारी रवींद्र ठाकरे यांनी नरखेड येथे सीएसआर फंडातून ऑक्सिजन निर्मिती प्रकल्पला मंजुरी मिळाल्याची माहिती दिली होती तसेच लवकरच या प्रकल्पाचे निर्माण कार्य सुरू होणार आहे, असे सांगितले होते. स्थानिक आमदार व माजी गृहमंत्री अनिल देशमुख यांनी नरखेड येथील ग्रामीण रुग्णालयाला कोरोना रुग्णासाठी ५० ऑक्सिजन बेडची व्यवस्था करून त्याचबरोबर ऑक्सिजन स्टोरेज टँक निर्माण करण्याची घोषणा केली होती. त्यानुसार येथे ५० ऑक्सिजन बेडतर मिळाले. मात्र, ९ महिन्यांचा कालावधी संपल्यानंतरही ना ऑक्सिजन प्रकल्प तयार झाला ना ऑक्सिजन स्टोरेज टँक निर्माण झाला. ऑक्सिजन प्रकल्पाची फाईल तर अद्यापही जिल्ह्यातून तहसीलकडे निघालीच नाही. त्यामुळे कोरोनाची तिसरी लाट रोखण्यासाठी आरोग्य विभागाचे प्रशासन किती सजग आहे, हे यावरून दिसून येते.
३५ नागरिकांचा गेला जीव.
२० महिन्यांपूर्वी सुरू झालेल्या कोविड संक्रमाणामुळे पहिल्या लाटेत नरखेड शहरातील २७१ व दुसऱ्या लाटेत ९५७ नागरिक संक्रमित झाले होते. त्यामध्ये पहिल्या लाटेत ५ तर दुसऱ्या लाटेत ३० अशा ३५ नागरिकांचा मृत्यू झाला होता. दुसऱ्या लाटेत शहरातील कोविड केअर सेंटरमध्ये सर्वांत जास्त मृत्यू ऑक्सिजनच्या अभावामुळेच झाले. दुसऱ्या लाटेच्या संक्रमणाची स्थिती पाहता रुग्णांना वाचविण्यासाठी सामाजिक स्तरांतून नागरिकांच्या सहकार्याने, विभिन्न राजकीय पक्ष तसेच शासनाकडून एकूण २५ ऑक्सिजन कॉन्सट्रेटर मशीन, आवश्यक औषधी, उपकरण, बेड, मास्क, रेमडिसिवार इंजेक्शन ग्रामीण रुग्णालयाला देण्यात आल्या होत्या. त्याचा रुग्णांना लाभ तर झालाच परंतू रुग्णालयाच्या निष्काळजी पणामुळे तीन ऑक्सिजन कॉन्सट्रेटर मशीन बंद पडल्या आहेत. पुढील काळात ऑक्सिजन कॉन्सट्रेटर मशीनची गरज पडल्यास किती मशीन कामात येईल हे काळच सांगेल. भविष्यात ऑक्सिजन गरज लक्षात घेता ९० जम्बो सिलिंडर उपलब्ध करण्यात आले. त्यापैकी ३० सिलिंडर भरले आहेत.
-
नरखेड शहरात ९० टक्के नागरिकांचे लसीकरण झाले आहे. पुढील महिन्यापर्यंत १०० टक्के लसीकरण पूर्ण करण्यात येईल. रुग्णालयात कर्मचाऱ्याच्या कमतरता असून सध्या सुरू असलेल्या साथीच्या आजारामुळे रुग्णालयात गर्दी दिसून येते. या आजाराच्या उपचारांबरोबर नागरिकांनी कोविड टेस्ट करून घ्यावी. यासोबतच कोविड प्रतिबंधात्मक नियमांचे पालन करावे.
- डॉ. दत्तात्रय वनकडस
आरोग्य अधीक्षक, ग्रामीण रुग्णालय