नागपूर : गर्लफ्रेंडसोबत जवळीक साधत असल्याची शंका आल्यामुळे अमनदीप सिंह राजपूत ऊर्फ पाजीचा त्याच्या मित्रानेच खून केल्याचे उघडकीस आले आहे. कपिलनगर पोलिसांनी म्हाडा क्वाॅर्टर येथील रहिवासी आरोपी सम्यक बागडे यास अटक केली आहे.
मंगळवारी रात्री २५ वर्षांच्या अमनदीप राजपूतचा म्हाडा क्वॉर्टरमध्ये सम्यक बागडेने खून केला होता. खून केल्यानंतर सम्यक फरार झाला होता. बुधवारी सकाळी त्याला अटक केल्यानंतर ही घटना उघडकीस आली. अमनदीप क्लिनरचे काम करीत होता. त्याची सम्यकसोबत जुनी मैत्री आहे. सम्यक गुन्हेगारी प्रवृत्तीच्या युवकांसोबत राहतो. एक १९ वर्षांची युवती त्याची गर्लफ्रेंड होती. सहा महिन्यापूर्वी सम्यकचा गर्लफ्रेंडसोबत ब्रेक अप झाला. सम्यकने अमनदीपला भेटण्यासाठी त्याच्या घरी येत होता. त्याला सम्यकच्या गर्लफ्रेंडबाबत माहिती होती. अमनदीपने आपल्या गर्लफ्रेंडसोबत मैत्री केल्याची सम्यकला शंका होती. त्यामुळे तो संतप्त झाला होता. त्याने अमनदीपला धडा शिकविण्याचे ठरविले. त्याने मंगळवारी रात्री नऊ वाजता अमनदीपला आपल्या घरी बोलावले. कामावरून परतल्यानंतर अमनदीप सम्यकच्या घरी पोहोचला. त्याला सम्यक आपल्यावर संतप्त असल्याची माहिती नव्हती. अमनदीप येताच सम्यकने त्याच्याशी वाद घातला. अमनदीप बाईकवरून घरी जात होता. त्याला रोखण्यासाठी सम्यकही बाईकवर स्वार झाला. त्याने मागून अमनदीपच्या गळ्यावर वार केला. जखमी झाल्यामुळे अमनदीपने बाईक थांबविली. त्यानंतर सम्यकने अमनदीपच्या चेहऱ्यावर चाकूने वार करून त्याचा खून केला.
........
सहा दिवसात दोन खून
सहा दिवसात म्हाडा क्वाॅर्टरमध्ये मुलीच्या वादातून खून होण्यााची ही दुसरी घटना आहे. १८ ऑगस्टला म्हाडा कॉलनीत एकतर्फी प्रेमातून बहिणीला त्रास देत असल्यामुळे संतप्त युवकांनी साथीदाराच्या मदतीने कमलेश सहारे या युवकाचा खून केला होता. आरोपींनी कमलेशला वस्तीत न येण्याची सूचना दिली होती. परंतु त्याकडे कमलेशने दुर्लक्ष केल्यामुळे त्याला जीव गमवावा लागला.
.........