लोकमत न्यूज नेटवर्क
नागपूर : गोरगरिबांना वेगवेगळे आमिष दाखवून धर्मांतरण करून घेणाऱ्या रँकेटमधील तिघांना उत्तर प्रदेशच्या एटीएसने (दहशतवाद विरोधी पथक) शुक्रवारी मध्यरात्री ताब्यात घेतले. काैसर आलम शाैकत अली खान, प्रसाद रामेश्वर कांबळे आणि भूप्रियबंदो देवीदास मानकर अशी या तिघांची नावे आहेत. ते गणेशपेठ परिसरात लपूनछपून वावरत होते. कांबळे हा मूळचा नागपुरातील रहिवासी आहे. काैसर धनबाद, लोहिचारा (झारखंड) येथील तर भूप्रियबंदो हा चामोर्शी (जि. गडचिरोली) येथील रहिवासी आहे. गोरगरिबांना पैशाचे आमिष दाखवून, त्यांच्या छोट्याछोट्या गरजा पूर्ण करून त्यांचे पद्धतशीर धर्मांतरण करून घेण्याचा प्रकार उत्तर प्रदेशमध्ये सुरू होता. एक मोठे रॅकेट त्यात गुंतले होते. गोमतीनगर पोलीस स्टेशनमध्ये धर्मांतर विरोधी कायद्याचा गुन्हा दाखल करून यूपी एटीएसने या रॅकेटचा भंडाफोड केला होता. रॅकेटमधील काहींना अटकही केली होती. त्यांच्याकडून मिळालेल्या माहितीवरून या रॅकेटमधील काही जण नागपुरात लपून असल्याचे यूपी एटीएसला कळले होते. त्यामुळे एटीएसच्या पथकाने शुक्रवारी नागपूर गाठले. पोलीस आयुक्त अमितेशकुमार यांची भेट घेऊन त्यांनी कारवाईसाठी मदत मागितली. त्यानंतर शुक्रवारी मध्यरात्री एटीएस आणि स्थानिक पोलिसांनी गणेशपेठ पोलीस ठाण्याच्या हद्दीत राहुल कॉम्प्लेक्समध्ये छापा घातला. येथे २०२ क्रमांकाच्या सदनिकेत लपून असलेल्या काैसर आलम, प्रसाद कांबळे आणि भूप्रियबंदोला जेरबंद केले. त्यांच्याकडून काही महत्वाची कागदपत्रेही आणि चिजवस्तूही जप्त करण्यात आल्या.
---
कारवाईबाबत गोपनीयता
या कारवाईबाबत कमालीची गोपनीयता बाळगण्यात आली होती. शनिवारी दुपारी ही कारवाई चर्चेला आल्यानंतर एकच खळबळ उडाली. स्थानिक अधिकाऱ्यांनी याबाबत दुपारपर्यंत फारसे बोलण्यास टाळाटाळ चालवली होती.
---