लपवाछपवीनंतरही अनेक खुलासे - मद्यसाठा रजिस्टरमध्ये तफावत - रक्त नमुन्यांच्या अहवालाची प्रतीक्षा
नरेश डोंगरे।
लोकमत न्यूज नेटवर्क
नागपूर : थर्टी फर्स्ट पार्टीच्या नावाखाली रेव्ह पार्टी सुरू असल्याची पोलिसांना टीप मिळाली होती. त्याचमुळे वरिष्ठ अधिकाऱ्यांनी पूर्ण तयारीनिशी हॉटेल तुली इम्पेरियलमध्ये धडक दिली. मात्र, पोलिसांची रिसेप्शनमध्ये एन्ट्री झाल्याचे पाहून वरच्यावर बरीचशी लपवाछपवी झाली. त्यामुळे पोलिसांना मद्याव्यतिरिक्त दुसरे कोणते ड्रग्ज आढळले नाही. परंतु, ताब्यात घेतलेल्या ६७ जणांच्या रक्ताचे नमुने पोलिसांनी घेतले आहेत. त्यातून पार्टीत सहभागी असणाऱ्यांपैकी कुणी गांजा, एमडी अथवा दुसरे कोणते ड्रग्ज घेतल्याचे उघड झाल्यास हॉटेल व्यवस्थापनाच्या अडचणी वाढू शकतात.
शहरातील छोट्या-मोठ्या बार, हॉटेलचे दार निर्धारित वेळेनंतर उघडे दिसल्यास पोलीस त्यांच्यावर तुटून पडल्यासारखी कारवाई करतात. मात्र, तारांकित हॉटेलमध्ये कारवाईची हिंमत दाखवली जात नाही. परफेक्ट टीप मिळूनही अनेकदा कारवाईच्या नावाखाली पोलीस तारांकित हॉटेलमधून चक्कर मारून आल्यासारखे येतात. मात्र, पोलीस आयुक्त अमितेशकुमार आणि गुन्हे शाखेचे उपायुक्त गजानन शिवलिंग राजमाने यांना तुली इम्पेरियलमध्ये थर्टी फर्स्टच्या नावाखाली रेव्ह पार्टी सुरू असल्याची माहिती कळताच पूर्ण तयारीनिशी हॉटेलमध्ये धडक दिली. मद्य, हुक्क्याशिवाय दुसरेही वेगळे ड्रग्ज मिळू शकतात, असा अंदाज असल्याने त्यांनी एनडीपीएसचे पथकही सोबत घेतले होते. मोठा फाैजफाटा घेऊन पोलिसांनी हॉटेलमध्ये छापा घातला. परंतु पोलीस आल्याचे लक्षात येताच डर्टी पार्टीचे ऑर्गनायझर सतर्क झाले. त्यांनी वरच्यावर बरीचशी लपवाछपवी केली. झिंगाट झालेल्यांना तातडीने वरच्यावर रूम मिळाल्याने ३०० ते ४०० जणांपैकी केवळ ६७ जणच डर्टी पार्टीत नाचताना आढळले. त्यानंतर पोलिसांनी चार ते पाच तास तेथे कसून तपासणी केली. परंतु हुक्का आणि मद्याव्यतिरिक्त दुसरे ड्रग्ज पोलिसांच्या हाती लागले नाही. पोलिसांनी ६७ जणांची वैद्यकीय तपासणी करून त्यांनी कोणत्या प्रकारची नशा केली, त्याची माहिती मिळवण्यासाठी त्यांच्या रक्ताचेही नमुने घेतले. त्याच्या वैद्यकीय अहवालाची पोलिसांना प्रतीक्षा आहे. यातून त्यांच्यापैकी कुणी मद्याव्यतिरिक्त दुसरे कोणते ड्रग्ज घेतल्याचे उघड झाल्यास रेव्ह पार्टीची माहिती अधोरेखित होईल. तसे झाल्यास हॉटेल प्रशासन चांगलेच अडचणीत येऊ शकते. या संबंधाने पोलीस आयुक्तांशी संपर्क केला असता, ‘आपली बांधिलकी जनतेशी आहे. कमिटेड पुलिसिंग करायची आहे, त्यामुळे कायदेशीर कारवाईत कोणतीही कसर ठेवली जाणार नाही’, असे अमितेशकुमार यांनी स्पष्ट केले.
---
हे झालेत खुलासे।
-रात्री १० नंतर बारला परवानगी नसताना ग्राहकांना मद्य देण्यात आले.
-परमिट रूमच्या मद्याच्या स्टॉकमध्ये गडबड झाली.
-परमिट रूममधून दुसरीकडे मद्यसाठा हलविला गेला.
-प्रतिबंधित असताना ग्राहकांना हुक्का देण्यात आला.
----
एक्साईजचाही निगेटिव्ह अहवाल
पोलिसांच्या कारवाईनंतर स्टेट एक्साईजच्या अधिकाऱ्यांनीही तुलीच्या विरोधात अहवाल तयार करून विभागीय गुन्ह्याची नोंद केली आहे.
हॉटेलमधील बारचे लायसन्स मोहब्बतसिंग तुली यांच्या नावे आहे. मद्यसाठ्याची तपासणी केली असता रजिस्टरच्या नोंदी आणि प्रत्यक्ष मिळालेल्या साठ्यात सर्व प्रकारच्या अनेक बाटल्या कमी आढळल्या आहेत. हा अहवाल आम्ही जिल्हाधिकाऱ्यांकडे सादर करणार असल्याची माहिती एक्साईजचे एसपी प्रमोद सोनोने यांनी लोकमतला दिली.
---