लोकमत न्यूज नेटवर्क
नागपूर - बसमध्ये चढताना महिलेच्या पर्समधील दागिने आणि रक्कम चोरणाऱ्या एका महिलेला प्रतापनगर पोलिसांनी अटक केली. वंदना मंगल लोंधे (वय ३८) असे तिचे नाव आहे. ती अजनी पोलीस ठाण्याच्या हद्दीतील जोगीनगर, टोली भागात राहते. हिंगणाजवळच्या गुमगाव येथे राहणाऱ्या मंगला घनाशाम चरडे (वय ४३) या त्यांचा भाचा अभिजित वरभे यांच्याकडे लग्नासाठी आल्या होत्या. लग्न आटोपल्यानंतर शुक्रवारी दुपारी ११.५० ते १२. २० च्या दरम्यान गुमगावला जाण्यासाठी स्नेहनगर, छत्रपती चाैक बसथांब्याजवळ आल्या. येथे बसमध्ये बसताना आरोपी महिला वंदना लोंधे हिने त्यांची नजर चुकवून पर्सची चेन उघडली. पर्समधून रोख २ हजार आणि सोन्याचे दागिने असा एकूण १ लाख, ९ हजारांचा ऐवज चोरला. हा प्रकार लक्षात आल्यानंतर मंगला चरडे यांनी प्रतापनगर ठाण्यात तक्रार नोंदवली. ठाणेदार दिनकर ठोसरे यांनी लगेच आपल्या सहकाऱ्यांना घटनास्थळी पाठवले. या भागात टोलीतील चोरट्या महिलांची टोळी घुटमळताना दिसताच सहा जणींना ताब्यात घेऊन पोलीस ठाण्यात आणण्यात आले. त्यातील चोरट्या वंदनाला मंगला यांनी ओळखले. त्यामुळे चोरीचा गुन्हा दाखल करून प्रतापनगर पोलिसांनी तिला अटक केली.
---
तीन दिवसाची कोठडी
वंदना लोंधेला पोलिसांनी आज न्यायालयात हजर करून तिचा १३ जुलैपर्यंत पीसीआर मिळवला. अशा प्रकारे बसमध्ये, धावत्या ऑटोत आणि गर्दीच्या ठिकाणी महिला - पुरुषांची रक्कम तसेच दागिने लांबविणारी एक मोठी टोळी गेल्या अनेक वर्षांपासून शहरात सक्रिय आहे. वंदनाची कसून चाैकशी केल्यास अनेक गुन्हे उजेडात येऊ शकतात.
---