लोकमत न्यूज नेटवर्क
नागपूर : नागपूर शहराची लोकसंख्या २८ लाखांवर आहे. शहराला दररोज सरासरी ६५० एमएलडी पाणीपुरवठा होतो. शहरातील प्रति कुटुंबाला ६०० ते ७०० लिटर पाणी पुरवठा होतो. लोकसंख्येचा विचार करता पाणीपुरवठा अधिक असला तरी शहरालगतच्या भागातील वस्त्यांना पिण्याच्या पाण्यासाठी टँकरची प्रतीक्षा करावी लागते.
भूगर्भातील पाणी पातळीचा विचार करता गेल्या दोन वर्षात चांगला पाऊस झाल्याने जिल्ह्यात पाणी पातळी ०.१३ मीटरने वाढली आहे. नागपूर शहरात ५५५७ बोअरवेल आहेत. परंतु शहरातील नागनदी व पिवळी नदी, पोहरा नदी व नाल्यांमुळे भूगर्भातील पाणी प्रदूषित झाले आहे. यामुळे बोरवेलच्या पाण्याचा पिण्यासाठी वापर करता येत नाही. परिणामी जलवाहिनीचे नेटवर्क नसलेल्या भागातील नागरिकांना टँकरवर विसंबून राहावे लागते.
.......
१९४ टँकरव्दारे पाणीपुरवठा
नागपूर शहराला दररोज ६५० ते ६७५ एमएलडी पाणीपुरवठा केला जातो. लोकसंख्येचा विचार करता शहरातील नागरिकांना होणारा पाणीपुरवठा अधिक आहे. असे असतानाही शहरालगतच्या भागात जलवाहिन्यांचे नेटवर्क नसल्याने १९४ टँकरव्दारे पाणीपुरवठा करावा लागतो. यामुळे मनपाला वर्षाला २० ते २५ कोटींचा खर्च करावा लागतो.
...
वर्षानुवर्षे टँकरची प्रतीक्षा
२४ बाय ७ योजनेंतर्गत शहरातील सर्व भागात जलवाहिन्यांचे नेटवर्क टाकण्याचे काम सुरू आहे. शहराच्या बहुसंख्य भागात जलवाहिन्या बदलण्यात आलेल्या आहेत. परंतु शहरालगतच्या दाभा, भांडेवाडी, पारडी, नारा, महेंद्र नगर, भरतवाडा यासह अन्य काही वस्त्यांना अजूनही टँकरव्दारे पाणीपुरवठा केला जातो. वर्षानुवर्षे या भागातील नागरिकांना टँकरची प्रतीक्षा करावी लागत असल्याची व्यथा या भागातील नागरिकांनी मांडली.
.....
बोअरवेल आहे पण वापर नाही
घराचे बांधकाम करताना बोअरवेल वा विहिरीच्या पाण्याचा वापर केला जातो. परंतु भूगर्भातील पाणी पिण्यायोग्य नसल्याने नळाच्या पाण्यावर विसंबून राहावे लागते. अमृत योजनेंतर्गत पाणीपुरवठा होत नसलेल्या वस्त्यात जलवाहिन्या टाकण्याचे काम हाती घेण्यात आले आहे. पुढील काही वर्षात या भागातील लोकांना पाणीपुरवठा होण्याची आशा आहे.
....
जलपुनर्भरणाला प्रोत्साहन
भूगर्भातील पाणी पातळी वाढण्यासाठी जलपुनर्भरण होण्यासाठी प्रोत्साहन दिले जाते. शासकीय कार्यालये, बगिचे, शाळा व अन्य इमारतीत रेन वॉटर हार्वेस्टींग यंत्रणा उभारण्यात आलेली आहे. नवीन बांधकाम करतानाही ही यंत्रणा उभारणे आवश्यक आहे. यासाठी मनपा प्रशासतातर्फे प्रोत्साहन दिले जाते.
मनोज गणवीर, कार्यकारी अभियंता
...
शहराची एकूण लोकसंख्या -२८,०००००
दररोज होणारा पाणीपुरवठा -६५०एमएलडी
शहरातील एकूण बोअरवेल -५५५७