चरण नाईकवारचा संशयास्पद मृत्यू

देवलापार : नागपूर येथे प्लंबरचे काम करणाऱ्या चरण नाईकवार (वय ३२) याचा मंगळवारी मृत्यू झाला. त्याचा मृतदेह संशयास्पद स्थितीत आढळून आल्याने परिसरात चर्चेला पेव फुटले आहे. चरण हा मूळचा सीतापार (लोधा), ता. रामटेक येथील रहिवासी आहे. तो नागपूरला मोलमजुरी करून कुटुंबाचा उदरनिर्वाह करीत होता. चरणचा मृतदेह बुधवारी सकाळी १० वाजताच्या दरम्यान कोठार (जि. सिवनी) येथील उड्डाणपुलाच्या खाली आढळून आला. त्याच्या गळ्यावर एक मोठी जखम असल्याचे बोलले जात आहे. चरण नाईकवार व त्याचा मित्र मंगलदास फागुराम गाडेकर (२७) हे राजीव नगर विश्वकर्मा मंदिराजवळ नागपूर येथे भाड्याने राहत होते. मंगलदास हा मूळचा सिवनी जिल्ह्यातील गंगेर्वा परिसरातील रहिवासी आहे. मंगलदासच्या वडिलांची प्रकृती बरी नसल्याने त्यांना नागपूर येथे उपचारासाठी आणण्यासाठी मंगलदास आणि चरण दोघेही सोमवारी रात्री १.३० वाजता मोटारसायकलने नागपूर येथून सिवनीकडे निघाले होते. मात्र, नागपूरवरून ८० किलोमीटर अंतरावरील कोठार नाल्याजवळील उड्डाणपुलाखाली चरण मृतावस्थेत दिसून आला. याबाबतची माहिती कुणीतरी त्याच्या कुटुंबीयांना दिली. चरणच्या मृत्यूसमयी मंगलदास कुठे होता हे कळू शकले नाही. कालांतराने तो घटनास्थळी पोहोचला असे सांगण्यात येत आहे. चरण याच्या पार्थिवावर सीतापार येथे अंत्यसंस्कार करण्यात आले. चरण याच्या मृत्यूचे गूढ शवविच्छेदन अहवाल आणि पोलीस तपासाअंती बाहेर येण्याची शक्यता आहे.