नागपूर : मनपाच्या अतिक्रमणविरोधी पथकाने मंगळवारी आसीनगर झोनमध्ये लष्करीबाग परिसरात आरामशीनची रस्त्याच्या कडेला असलेली लाकडे हटविली.
अधिकाऱ्यानुसार काही आरामशीन मालकांनी या परिसरात रस्त्याच्या कडेला मोठ्या प्रमाणात लाकडे एकत्रित केली होती. त्यामुळे पायदळ चालणाऱ्यांना आणि वाहनचालकांना गाड्या काढण्यास त्रास व्हायचा. यासंदर्भात नागरिकांनी आसीनगर झोन कार्यालयात लेखी तक्रार केली होती. त्यानुसार दुपारी १२.३० वाजता पथक लष्करीबाग आरामशीन परिसरात पोहोचले. आरामशीन संचालकांना रस्त्याच्या कडेला असलेली लाकडे हटविण्यास सांगितले. त्यानंतर लाकडे हटविण्यात आली. पथकाने आवळे बाबू चौक ते कमाल चौक, इंदोरा चौकापर्यंत १५ अतिक्रमणे हटविली. शिवाय कमाल चौक ते इंदोरापर्यंत रस्ते आणि फूटपाथवरील हातठेले हटविले. कामठी रोडवर आंबेडकर हॉस्पिटल समोरील फूटपाथवरील फर्निचर विक्रेत्यांना हटविण्याची कारवाई करण्यात आली. ही कारवाई प्रवर्तन विभागाचे निरीक्षक संजय कांबळे यांच्या नेतृत्वातील पथकाने केली.