नागपूर : अमूर्त (ॲब्स्ट्रॅक्ट) शैलीतील चित्रकारितेचा एक काळ गाजवणारे प्रख्यात चित्रकार सुधीर पुरुषोत्तम तलमले यांचे सोमवारी दीर्घ आजाराने निधन झाले. ते ५७ वर्षांचे होते. मोक्षधाम घाट येथे त्यांच्या पार्थिवावर अंत्यसंस्कार करण्यात आले. त्यांच्या पश्चात पत्नी, एक मुलगा, एक मुलगी व असंख्य असा शिष्य परिवार आहे.
सिरसपेठ, रेशीमबाग येथील निवासी सुधीर तलमले हे शहरातील प्रतिथयश असे चित्रकार होते. त्यांनी बी.एफ.ए. व एम.एफ.ए.चे शिक्षण नागपुरातून घेतल्यानंतर सुरुवातीच्या काळात नागपूर दूरदर्शनला त्यांनी ग्राफिक आर्टिस्ट म्हणून नोकरी केली. मात्र, अल्पावधीतच त्यांनी ती नोकरी सोडून मुक्त चित्रकार म्हणून काम करण्यास सुरुवात केली. साधारणत: ३०-३५ वर्षे मुक्त चित्रकार म्हणून कारकीर्द घडविणारे सुधीर तलमले यांनी अमूर्त शैलीत छाप सोडली आहे. त्यांच्या चित्रांचे प्रदर्शन नागपूरसह मुंबई, दिल्ली व अन्य शहरांमध्ये लागलेले आहे. त्यांना अनेक राष्ट्रीय व राज्यस्तरीय पुरस्कार प्राप्त झाले असून, त्यांचा मोठा शिष्यवर्ग आहे.
...................