पिली नदी डम्पिंग यार्डमध्ये परिवर्तित

नागपूर : प्रशासन पिली नदीच्या साफसफाईसंदर्भात उदासीन आहे. त्यामुळे पिली नदी डम्पिंग यार्डमध्ये परिवर्तित होत आहे.

वनदेवीनगर पूल परिसरात या नदीमध्ये कचऱ्याचे ढीग साचले आहेत. मृत जनावरे अनेक दिवसांपासून पडली आहेत. त्यांची दुर्गंधी सर्वत्र पसरली आहे. डासांचा प्रकोपही वाढला आहे. परिणामी, नागरिकांचे आरोग्य धोक्यात आले आहे. परंतु, प्रशासन याविषयी गंभीर नाही. पिली नदीची सफाई करण्यासाठी नगरसेवक व आमदाराला अनेकदा निवेदने देण्यात आली. परंतु, कुणीही धावून आले नाही. पिली नदी दिवसेंदिवस घाण होत आहे.

---------------

प्लांटसाठी पाणी थांबवतात

स्थानिक नागरिक अज्जू खान, रियाज शेख, इश्तियाक अन्सारी, जावेदभाई, जहीर अन्सारी, सलीम अन्सारी, इम्रान खान आदींनी दिलेल्या माहितीनुसार, नदीच्या काठावरील एका प्लांटसाठी पाणी थांबवले जाते. त्यामुळे नदीच कचरा साचतो. प्रशासन नदीची सफाई करीत नाही. परिणामी, पाणी दूषित झाले आहे. ही नदी हळुहळु नाल्याचे स्वरुप धारण करीत आहे. नदीत मृत कुत्रे, डुकरे इत्यादी जनावरे पडली आहेत. त्यांची दुर्गंधी सर्वत्र पसरली आहे.

-----------------

सफाई झाली आहे

वनदेवीनगर पुलाजवळ नदीची नियमित सफाई केली जाते. १५ दिवसांपूर्वी पोकलॅण्ड मशीनने नदीची सफाई करण्यात आली. येत्या शुक्रवारीही वनदेवीनगर परिसरातील नदीचे निरीक्षण करून आवश्यक सफाई केली जाईल.

-- गोपी कुमरेल, नगरसेवक.