नागपूर : इंडियन मेडिकल असोसिएशनने मुंबई उच्च न्यायालयाच्या नागपूर खंडपीठात याचिका दाखल करून केंद्र सरकारची अधिसूचना व सर्वोच्च न्यायालयाच्या निर्णयानुसार डीएमएलटी अभ्यासक्रम उत्तीर्ण व्यक्ती पॅथाॅलॉजी लॅब चालवू शकत नाही, असा दावा केला आहे. या प्रकरणात न्यायालयाने सोमवारी राज्याच्या वैद्यकीय शिक्षण व औषधी द्रव्ये विभागाचे सचिव, महाराष्ट्र पॅरामेडिकल कौन्सिल व इतर प्रतिवादींना नोटीस बजावून यावर चार आठवड्यात उत्तर सादर करण्याचे निर्देश दिले.
प्रकरणावर न्यायमूर्तीद्वय सुनील शुक्रे व अनिल किलोर यांच्यासमक्ष सुनावणी झाली. महाराष्ट्र पॅरामेडिकल कौन्सिलने जुलै-२०१८ मध्ये आदेश जारी करून डीएमएलटी अभ्यासक्रम उत्तीर्ण व्यक्तींना पॅथाॅलॉजी लॅब चालवण्याची परवानगी दिली आहे. हा आदेश केंद्र सरकारची अधिसूचना व सर्वोच्च न्यायालयाच्या निर्णयाचे उल्लंघन करणारा आहे. केंद्र सरकारच्या अधिसूचनेनुसार साधी पॅथाॅलॉजी लॅब चालवणारी व्यक्ती एमबीबीएस आणि मध्यम व उच्च तांत्रिक पॅथाॅलॉजी लॅब चालवणारी व्यक्ती एमडी अभ्यासक्रम उत्तीर्ण असणे आवश्यक आहे. तसेच, सर्वोच्च न्यायालयाच्या निर्णयानुसार एमबीबीएस व एमडी अभ्यासक्रम उत्तीर्ण व्यक्तीशिवाय इतर कुणाला पॅथाॅलॉजी अहवाल देण्याचा अधिकार नाही. त्यामुळे डीएमएलटी अभ्यासक्रम उत्तीर्ण व्यक्ती पॅथाॅलॉजी लॅब चालवू शकत नाही हे घोषित करण्यात यावे व महाराष्ट्र पॅरामेडिकल कौन्सिलचा वादग्रस्त आदेश रद्द करण्यात यावा, असे इंडियन मेडिकल असोसिएशनचे म्हणणे आहे. असोसिएशनच्या वतीने ॲड. भानुदास कुलकर्णी यांनी कामकाज पाहिले.