लोकमत न्यूज नेटवर्क
नागपूर : स्वतःहून मीटरचे रीडिंग पाठविण्यास वीजग्राहकांकडून प्रतिसाद वाढत आहे. गेल्या एप्रिल महिन्यात २ लाख २ हजार ७४२ ग्राहकांनी मोबाइल अ‍ॅप, वेबसाईट व एसएमएसद्वारे मीटरचे रीडिंग महावितरणकडे पाठविले आहे. यामध्ये नागपूर परिमंडळातून ७२६९, अकोला - ७१८० तर पुणे परिमंडळातील सर्वाधिक ४९,९५० त्यापाठोपाठ कल्याण परिमंडळातील २८,९१६ वीजग्राहकांचा समावेश आहे.
वीजग्राहकांना स्वतःहून मीटर रीडिंग पाठविण्याची सोय महावितरणने उपलब्ध करून दिली आहे. वीजग्राहकांचा प्रतिसाद पाहून ही सोय कायम ठेवण्यासोबतच मीटर रीडिंग पाठविण्याची मुदतदेखील चार दिवस करण्यात आली आहे. दरम्यान, कोरोना प्रादुर्भावाच्या आपत्कालीन परिस्थितीत आता मोबाइल एसएमएसद्वारेदेखील मीटर रीडिंग पाठविण्याची खास सोय उपलब्ध आहे. याआधी मागील मार्च महिन्यात १ लाख ३५ हजार २६१ ग्राहकांनी मीटर रीडिंग पाठविले होते. या ग्राहकांमध्ये एप्रिल महिन्यात ६७ हजार ४८१ संख्येने वाढ झाली आहे.
प्रत्येक महिन्याच्या १ ते २५ तारखेपर्यंत एका निश्चित तारखेला लघुदाब वीजजोडणीच्या मीटरचे फोटो रीडिंग घेण्यात येत आहे. ग्राहकांना मीटरच्या रीडिंगसाठी दरमहा निश्चित तारखेच्या एक दिवस आधी रीडिंग पाठविण्याची एसएमएसद्वारे विनंती करण्यात येत आहे. तेव्हापासून चार दिवसांपर्यंत ग्राहकांना स्वतःहून रीडिंग पाठविता येत आहे. गेल्या एप्रिल महिन्यात राज्यातील २ लाख २ हजार ७४२ ग्राहकांनी स्वतःहून मीटर रीडिंग पाठविलेले आहे. यात पुणे परिमंडलमधील ४९९५०, कल्याण - २८९१६, नाशिक - २२३३०, भांडुप - १८०९३, बारामती - १३७३३, जळगाव - १०८७७, औरंगाबाद - १०१००, कोल्हापूर - ८४७०, नागपूर - ७२६९, अकोला - ७१८०, लातूर - ६०८५, अमरावती - ५६६२, कोकण - ४२२३, गोंदिया - ३४६४, नांदेड - ३२६२ व चंद्रपूर परिमंडळातील ३,१३८ वीजग्राहकांचा समावेश आहे.