लोकमत न्यूज नेटवर्क
नागपूर : नागरिकांनी मुद्रांक शुल्क भरण्यासाठी ऑनलाईन सुविधेचा वापर करावा. तसेच परवानाधारक मुद्रांक विक्रेत्यांकडूनच (स्टँम्प व्हेंडर) मुद्रांक पेपर खरेदी करण्याचे आवाहन सह जिल्हा निबंधक तथा मुद्रांक जिल्हाधिकारी आर. बी. मुळे यांनी केले आहे.
जिल्हाधिकारी रवींद्र ठाकरे यांनी याबाबत नुकतीच एक बैठक घेतली होती. निर्धारित किमतीपेक्षा अधिक दराने विकल्या गेल्याच्या तक्रारी आल्यास व अन्य गैरव्यवहार केल्यास मुद्रांक विक्रेत्यांचा परवाना रद्द करण्याचे व कारवाई करण्याचे संकेत दिले होते. शहरातील सह दुय्यम निबंधक कार्यालयाच्या अधिनस्त एकूण ५३ परवानाधारक मुद्रांक विक्रेते कार्यरत आहेत.
कोषागारात मुबलक मुद्रांक साठा असून परवानाधारकांनी एक लाख रुपयापर्यत ग्रास प्रणालीतून ई-चलान भरल्यानंतर मुद्रांक साठा प्राप्त झाल्यानंतर लगेच दुसरी चलान कोषागारात सादर करावी, असे वरिष्ठ कोषागार अधिकारी अरविंद गोडे यांनी कळवले आहे.
परवानाधारक मुद्रांक विक्रेत्याव्यतिरिक्त इतर व्यक्तीकडून मुद्रांक खरेदी करू नयेत. तसेच त्यांनी जादा पैशाची मागणी केल्यास संबंधित सहदुय्यम निबंधक कार्यालयास तक्रार द्यावी.
नागरिकांना आवश्यक कामासाठी लागणारे मुद्रांक ई-पेमेंटव्दारे खरेदी करता येतील. याबाबतची कार्यपध्दती नोंदणी विभागाच्या वेबसाईटवर डब्ल्यू डब्ल्यू डब्ल्यू डॉट आयजीआर महाराष्ट्रा डॉट जीओव्ही डॉट इन वर उपलब्ध आहे.