लोकमत न्यूज नेटवर्क
नागपूर : उपराजधानीत घडणाऱ्या अनेक गंभीर गुन्ह्यांमध्ये अल्पवयीन गुन्हेगार सहभागी असल्याचे आढळून येत आहे. त्यामुळे पोलिसांच्या कपाळावरच्या आठ्या वाढल्या आहेत. आता यांचं कसं करावं, असा प्रश्न पोलिसांसमोर उपस्थित झाला आहे.
शहरातील गुन्हेगारी नियंत्रित करण्यासाठी पोलीस आयुक्तांनी विशेष ॲक्शन प्लॅन तयार केला आहे. त्यानुसार गेल्या चार महिन्यांत अनेक मोठ्या गुंडांवर हद्दपारी, एमपीडीए,
मकोकासारखी कडक कारवाई करण्यात आली आहे. हाती आलेल्या प्रत्येक मोठ्या गुन्हेगाराचा खुद्द पोलीस आयुक्तच क्लास घेतात. त्यामुळे शहरातील कुख्यात असणाऱ्यांपैकी अनेक गुन्हेगार चांगलेच दहशतीत आले आहेत. मात्र, नव्याने गुन्हेगारीत सक्रिय झालेले आणि १८ वर्षांपेक्षा कमी वय असलेले अनेक गुन्हेगार सोकावल्यासारखे झाले आहेत. शहरातील हत्या, बलात्कार, चोरी, घरफोड्या आणि अमली पदार्थांच्या तस्करीत अल्पवयीन गुन्हेगारांचा सहभाग असल्याचे धक्कादायक वास्तव पुढे आले आहे.
गेल्या तीन आठवड्यांत घडलेल्या इंदल बेलपारधी, रोशन कुंभारे तसेच अंकित बोकडे या तिघांच्या हत्याकांडात अल्पवयीन आरोपींचा सहभाग उघड झाला आहे. एवढेच नव्हे तर बलात्काराच्या प्रकरणात अल्पवयीन गुन्हेगारांची संख्या मोठी आहे. गेल्या आठवड्यात एका १६ वर्षांच्या आरोपीने उत्तर नागपुरातील १५ मुलीला गर्भवती बनविले. एमआयडीसीतील १६ वर्षांच्या मुलीसोबत १७ वर्षांच्या आरोपीने दोन वर्षांपासून ५० पेक्षा जास्त वेळा शरीरसंबंध जोडले. विविध पोलीस ठाण्यात उघडकीस आलेल्या वाहन चोरीच्या घटनांतही अल्पवयीन आरोपींचा सहभाग असल्याचे वेळोवेळी उघड झाले आहे. सराईत गुन्हेगारांना वठणीवर आणण्यासाठी पोलीस कठोर उपाय योजना करतात. मात्र, अल्पवयीन असलेल्या गुन्हेगारांवर पोलिसांना कठोर कारवाई करता येत नाही. काही दिवसांसाठी त्यांना सुधारगृहात पाठविले जाते. तिकडून परत येताच ते सराईत बनतात आणि गुन्हेगारीत नव्या दमाने सक्रिय होतात. या एकूणच प्रकारामुळे पोलिसांसमोर नवीनच आव्हान उभे ठाकले आहे.
---
नशेच्या गोळ्यांचा वापर
मोठेच नव्हे तर अल्पवयीन गुन्हेगारही गुन्हा करण्यापूर्वी नशेच्या गोळ्यांचा वापर करतात. प्रतिबंध असूनही अनेक मेडिकल स्टोअर्सचे संचालक डॉक्टरांच्या प्रिस्क्रिप्शनशिवाय जास्त पैसे घेऊन या नशेच्या गोळ्या देतात. ज्या घेतल्यानंतर गुन्हेगार काय करतो, याचे त्याला भान उरत नाही.
---