लोकमत न्यूज नेटवर्क
नागपूर - बेलतरोडी पोलिसांनी गुरुवारी रात्री एका सराईत गुन्हेगाराला जेरबंद केले. शैलेंद्र ऊर्फ सानू जयनारायण शुक्ला (वय २९) असे त्याचे नाव असून पोलिसांनी त्याच्याकडून चाकू आणि चोरीची दुचाकी जप्त केली.
सोमलवाड्यातील झेंडा चाैकात राहणारा आरोपी सानू सराईत गुन्हेगार आहे. बेलतरोडीचे ठाणेदार विजय आकोत, पीएसआय विकास मनपिया आणि त्यांचे सहकारी गुरुवारी रात्री आपल्या पोलीस ठाण्याच्या हद्दीत गुन्हेगारांच्या शोधात फिरत असताना आरोपी सानू त्यांना संशयास्पद अवस्थेत दिसला. पोलीस आपल्याकडे येत असल्याचे पाहून तो पळू लागला. मात्र, पोलिसांनी त्याचा पाठलाग करून त्याच्या मुसक्या बांधल्या. त्याची झडती घेतली असता त्याच्याकडे चाकू आढळला. त्यामुळे सानूला ताब्यात घेऊन पोलिसांनी ठाण्यात आणले. तेथे त्याची चाैकशी केली असता तो चोरी लुटमारीसारखा गुन्हा करण्याच्या तयारीत असल्याचे स्पष्ट झाले. त्याच्या ताब्यात असलेली मोटरसायकल त्याने अजनी पोलीस ठाण्याच्या हद्दीतून काही दिवसांपूर्वी चोरली होती, हे कबूल केले. त्याला चोरी आणि शस्त्र प्रतिबंधक कायद्यानुसार अटक करण्यात आली.
---
आणखी गुन्हे उघड होण्याची शक्यता
आरोपी सानूची वृत्ती लक्षात घेता त्याने आणखी काही गुन्हे केले असावे,असा संशय आहे. त्याची पोलीस चाैकशी करीत आहेत. ठाणेदार विजय आकोत, उपिनरीक्षक विकास मनपिया, हवलदार शैलेश बडोदेकर, तेजराम देवळे, रणधीर दीक्षित, मिलिंद पटले, बजरंग जुनघरे, गोपाल देशमुख, कमलेश गणेर, राजेंद्र नागपुरे, कृणाल लांडगे आदींनी ही कामगिरी बजावली.
----