लोकमत न्यूज नेटवर्क
नागपूर: नागपूर शहरात १८ वर्षांवरील नागरिकांना लसीकरणाला सुरुवात तर झाली आहे. परंतु त्याप्रमाणात डोसचा पुरवठा होत नाही. यामुळे मागील सात दिवसात तीन दिवस शहरातील लसीकरण केंद्र बंद ठेवावे लागले. २३ जूनला १८ वर्षांवरील लसीकरणाला सुरुवात झाली. परंतु मागणीनुसार पुरवठा होत नसल्याने २५ जून, २७ जून व २९ जून रोजी लसीकरण झाले नाही. त्यात मंगळवारी सायंकाळपर्यंत मनपाला डोस उपलब्ध झाले नाही. यामुळे बुधवारी पुन्हा शहरातील लसीकरण केंद्र बंद ठेवण्याचा निर्णय घेण्यात आला आहे.
शासनाकडून कोविशिल्डचा पुरेसा साठा उपलब्ध झाला नाही. यामुळे बुधवारी लसीकरण केंद्र बंद राहणार असल्याची माहिती मनपाचे अतिरिक्त आयुक्त राम जोशी यांनी दिली. परंतु तीन केंद्रावर कोव्हॅक्सिन दिली जाणार आहे. यात मेडिकल कॉलेज, स्व. प्रभाकरराव दटके रोग निदान केंद्र व डॉ. बाबासाहब आंबेडकर रुग्णालयाचा समावेश आहे. कोव्हॅक्सिनसाठी ऑनलाईन नोंदणी आवश्यक आहे.
नागपूर शहरात १८ ते ४४ वयोगटातील लोकांचा डोस घेण्याला उत्साही प्रतिसाद आहे. या वयोगटात २८ जूनपर्यंत शहरात १ लाख ४६ हजार ५११ लाभार्थींना डोस देण्यात आले. तर २८ जूनपर्यंत एकूण ६ लाख ६६ हजार २७२ लाभार्थींनी पहिला डोस घेतला. तर एकूण २ लाख १२ हजार ३८५ लाभार्थींनी दुसरा डोस घेतला. आतापर्यंत एकूण ८ लाख ७८ हजार ६५७ डोस नागपूर शहरात देण्यात आले.
...
नागपूरात लसीकरणाची अद्ययावत स्थिती (२८ जून २०२१)
पहिला डोस
आरोग्य सेवक- ४६,२६६
फ्रंटलाईन वर्कर- ५३,२९६
१८ वयोगट- १,४६,५११
४५ वयोगट- १,५०,४४३
४५ कोमार्बिड - ८५,९५८
६० सर्व नागरिक- १,८३,७९८
पहिला डोस - एकूण - ६,६६,२७२
दुसरा डोस
आरोग्य सेवक- २,५३,३४२
फ्रंटलाईन वर्कर- २२,७०२
१८ वयोगट- ७,७५६
४५ वयोगट- ४५,१७६
४५ कोमार्बिड - २१,६२२
६० सर्व नागरिक-८९,२१७
दुसरा डोस - एकूण - २,१२,३८५
संपूर्ण लसीकरण एकूण - ८,७८,६५७