शरद मिरे
भिवापूर : नागपूर-नागभीड नॅरोगेजला नवा ‘लुक’ देण्यासाठी शासनाने ब्रॉडगेजची घोषणा केली. वर्षानुवर्षे हवेत असलेल्या या घोषणेची आता आश्वासनपूर्तीकडे वाटचाल सुरू असून, ब्रॉडगेजच्या कामाला गती आली आहे. नॅरोगेजचे रुळ काढत, खोदकाम व सपाटीकरणाचे काम सुरू आहे. ब्रॉडगेज निर्मितीच्या जलदगतीमुळे परिसरातील नागरिक समाधान व्यक्त करीत आहे. १९१३ पासून या मार्गाने नागपूर-नागभीड रेल्वेगाडी धावते. हा नॅरोगेज रेल्वेमार्ग ब्रॉडगेज व्हावा, अशी मागणी सर्वप्रथम १९५२ मध्ये करण्यात आली होती. त्यानंतर थंडबस्त्यात असलेल्या या मागणीने मध्यंतरीच्या काळात पुन्हा जोर धरला. पण पुढे काहीच झाले नाही. दरम्यान, ममता बॅनर्जी रेल्वेमंत्री असताना त्यांनी हा मार्ग ब्रॉडगेज करण्याची घोषणा केली. मात्र अनेक वर्ष ही घोषणा हवेत होती. त्यानंतर केंद्र व राज्य शासनातील निधीचा तिढा सुटताच ब्रॉडगेज निर्मितीच्या कामाला ‘ग्रीन सिग्नल’ मिळाला. रेल्वे विभागाने नागपूर-नागभीड रेल्वेमार्गावर धावणाऱ्या ‘शकुंतला एक्स्प्रेस’ची चाके थांबविण्याचा निर्णय घेतला. २५ नोव्हेंबर २०१९ पासून शकुंतलाचा प्रवास थांबला. मात्र ज्या कामासाठी ही रेल्वे बंद करण्यात आली, त्या ब्रॉडगेज निर्मितीच्या कामाला वर्षभरात हात लागलेला नव्हता. मात्र गत सहा महिन्यापासून नागपूर-कुही-उमरेड-भिवापूर- नागभीड या चारही भागात ब्रॉडगेज निर्मितीच्या कामाने वेग धरला आहे.
आतापर्यंत काय झाले
गत सहा महिन्यापासून ब्रॉडगेज निर्मितीच्या कामाने वेग घेतला आहे. काम सुरू झाल्यापासून आतापर्यंत भिवापूर परिसरात पूर्वीच्या रेल्वेलाईनवरील नॅरोगेजचे संपूर्ण गेज (रुळ) काढण्यात आले आहेत. ‘गेज’ असलेल्या उंच मार्गाचे सपाटीकरण करण्यात येत आहे. भिवापूर शहर चार भागात वसले असून, यातील दिघोरा व भूदान या दोन प्रभागात जाण्याकरिता रेल्वेलाईन क्रॉस करावी लागते. त्यामुळे या दोन्ही ठिकाणी पुलाची निर्मिती करण्यात येत आहे. यातील दिघोरा रेल्वे क्रॉसिंगवर पुलाचे खोदकाम सुरू झाले आहे.