लोकमत न्यूज नेटवर्क
नागपूर : बहिणीची छेडखानी करणाऱ्या आरोपीचा एका युवकाने साथीदारांच्या मदतीने खून केला. ही घटना बुधवारी रात्री कपिलनगर पोलीस ठाण्यांतर्गत म्हाडा क्वाॅर्टरमध्ये घडली. कमलेश बंडू सहारे (२५) रा. गड्डीगोदाम असे मृताचे नाव आहे तर उज्ज्वल व त्याचे साथीदार, अशी आरोपींची नावे असल्याचे सांगितले जाते.
उज्ज्वलच्या बहिणीसोबत कमलेशची ओळख होती. कुटुंबीयांना याची माहिती होताच प्रकरण वाढले. कुटुंबीयांच्या तक्रारीवरून कमलेशविरुद्ध कपिलनगर पोलिसांनी छेडखानीचा गुन्हा दाखल केला होता. अटक झाल्यानंतर कमलेशची तुरुंगात रवानगी झाली होती. अलीकडेच तो जामिनावर सुटून आला होता. उज्ज्वलच्या कुटुंबीयांनी कमलेशला परिसरात न येण्याची समज दिली होती. मंगळवारी एसीपीकडे पेशीदरम्यानसुद्धा कमलेशला उज्ज्वलच्या घराकडे जाण्यास मनाई करण्यात आली होती.
कमलेशची बहीण कपिलनगरातील म्हाडा क्वाॅर्टरमध्ये राहते. कमलेश बुधवारी रात्री ७ वाजता बहिणीच्या घरी आला होता. उज्ज्वलही परिसरात राहतो. कमलेश आल्याची माहिती होताच तो आपल्या साथीदारांसह कमलेशच्या बहिणीच्या घरी पोहोचला. त्याने घरासमोरच कमलेशवर हल्ला केला. त्याचा खून करून तो फरार झाला. या घटनेमुळे परिसरात तणाव निर्माण झाला आहे. झोन पाचचे डीसीपी नीलोत्पल घटनास्थळी पोहोचले. त्यांनी उज्ज्वलच्या संशयित साथीदारांना ताब्यात घेतले. रात्री उशिरापर्यंत कपिलनगर पोलीस प्रकरणाच्या तपासात गुंतले होते.