नागपूर : महापालिकेच्या उपद्रवशोध पथकाने बुधवारी आशीनगर झोनमधील वैशालीनगर येथील एनआयटी चौकातील श्री कलेक्शन व हनुमाननगर झोनमधील म्हाळगीनगर चौकातील सागर आइस्क्रीम पार्लर यांनी कोविड नियमांचे उल्लंघन केल्याने दोन्ही दुकाने सील केली.
महापालिकेने ३४ प्रतिष्ठानांवर कारवाई करून २ लाख ६८ हजारांचा दंड वसूल केला. पथकाने ५२ प्रतिष्ठाने व दुकानांची तपासणी केली. लक्ष्मीनगर झोनअंतर्गत चार प्रतिष्ठानांची तपासणी करून ६० हजारांचा दंड करण्यात आला. धरमपेठ विभागांतर्गत चार प्रतिष्ठानांची तपासणी करून ३० हजार, हनुमाननगर पथकाने तीन दुकानाची तपासणी करून १० हजार, धंतोलीच्या पथकाने १६ दुकानांची तपासणी १८ हजारांचा दंड वसूल केला. नेहरूनगर येथे चार प्रतिष्ठानांची तपासणी करून १५ हजार रुपये, गांधीबाग येथे सहा प्रतिष्ठानांची तपासणी करून ७० हजार रुपये, सतरंजीपुरा येथे तीन प्रतिष्ठानांची तपासणी करून ३० हजार रुपये दंड वसूल केला. लकडगंज पथकाने सात दुकानांची तपासणी करून १० हजार रुपये, आसीनगर पथकाने १२ प्रतिष्ठानांची तपासणी करून पाच हजार रुपये, तर मंगळवारी (दि. ११) झोन पथकाने तीन दुकानांची तपासणी करून २० हजार रुपयांचा दंड वसूल केला. महापालिका आयुक्त राधाकृष्णन बी. यांच्या निर्देशानुसार उपद्रवशोध पथकप्रमुख वीरसेन तांबे यांच्या मार्गदर्शनाखाली विभागीय शोधपथकांद्वारे ही कारवाई केली जात आहे.