लोकमत न्यूज नेटवर्क
नागपूर - मृत व्यक्तीच्या बँक खात्यातील रकमेला पाय फुटले. अज्ञात आरोपीने बनावट सह्या करून मृत व्यक्तीच्या खात्यातून साडेतीन लाख रुपये काढून घेतले. विशेष म्हणजे, ॲक्सिस बँकेच्या शंकरनगर शाखेत घडलेला हा फसवणुकीचा प्रकार तब्बल १० महिन्यांनंतर बँक अधिकाऱ्यांच्या लक्षात आली.
शाखा व्यवस्थापक जयराम प्रल्हाद घाटुरकर (वय ३८, रा. दिघोरी) यांनी सीताबर्डी पोलीस ठाण्यात नोंदविलेल्या तक्रारीनुसार, ॲक्सिस बँकेच्या शंकरनगर शाखेत नंदराम रायपुरे यांचे बँक खाते आहे. त्यांची गॅस एजन्सी आणि अन्य व्यवसाय असल्याचे समजते. ते बरेचदा चेकने व्यवहार करायचे. त्यांचे काही महिन्यांपूर्वी निधन झाले. अज्ञात आरोपींनी चेकवर बनावट सह्या करून रायपुरे यांच्या खात्यातून २३ नोव्हेंबर २०२० ते ३० जानेवारी २०२१ या कालावधीत ३ लाख ४४ हजार ५०६ रुपये काढून घेतले. आरोपीने बँक अधिकाऱ्यांच्या डोळ्यात सव्वादोन महिन्यात अनेकदा धूळफेक केली. त्यावेळी बँक अधिकाऱ्यांकडून सतर्कता दाखवण्यात आली नाही. तब्बल १० महिन्यांनंतर हा गैरप्रकार बँक अधिकाऱ्यांच्या लक्षात आल्यानंतर त्यांनी सीताबर्डी ठाण्यात तक्रार नोंदवली.
-----
संपर्कातील व्यक्तींचा सहभाग?
पोलिसांनी या प्रकरणी अज्ञात आरोपींविरुद्ध शुक्रवारी गुन्हा दाखल केला. या प्रकरणात चेकने व्यवहार झाल्यामुळे रायपुरे यांच्या संपर्कातील व्यक्तीचा सहभाग असावा, असा संशय आहे. पोलीस आरोपीचा शोध घेत आहेत.
----