राजीव सिंह
लोकमत न्यूज नेटवर्क
नागपूर : शहरातील नागरिकांना कोविड नियमांचे पालन करण्याचा सल्ला देणारे मनपातील पदाधिकारी व अधिकारी परिवहन सेवेबाबत उदासीन आहेत. सध्या मनपा प्रशासनाने जारी केलेल्या आदेशानुसार आसन क्षमतेनुसार बसमध्ये प्रवाशांना बसण्याची मुभा दिली आहे. परंतु शहरातील अनेक मार्गावर बसफेऱ्या कमी असल्याने प्रवाशांना नाईलाजास्तव बसमध्ये उभ्याने प्रवास करावा लागत आहे. कंडक्टर बसमध्ये चढू देत नाही. परंतु आवश्यक ठिकाणी जाण्यासाठी प्रवाशांना जोखीम स्वीकारावी लागत आहे. शहरात २०० बस धावत आहेत. नियमांचे पालन करण्यासाठी मनपा प्रशासनाला बसच्या फेऱ्यात वाढ करावी लागेल.
सध्या शहरातील संक्रमण दर एक टक्क्याच्या खाली आहे. सक्रिय रुग्णांची संख्या एक हजारापेक्षा कमी आहे. शनिवारी शहरात फक्त आठ पॉझिटिव्ह मिळाले. संयम व नियमांचे पालन केल्याने हे शक्य झाले. यामुळे शहरातील नागरिकांचे हित लक्षात घेता, परिवहन सेवेकडे मनपा प्रशासनाला लक्ष द्यावे लागेल. बसफेऱ्यात वाढ करून ३०० हून अधिक बस करण्याची नितांत गरज आहे. सोमवारी कोचिंग संस्थांसह अन्य सेवांची वेळ वाढविण्यात आली आहे. याचा विचार करता बस संख्या वाढवावी लागेल. अन्यथा बसमध्ये गर्दी झाल्यास कोरोना संक्रमणाचा गंभीर धोका आहे. बसमधून प्रवास करणारे प्रवासी मास्क व सॅनिटायझरचा वापर करीत आहेत. आता मनपा प्रशासनाला आपली जबाबदारी पार पाडावी लागेल.
मिळालेल्या माहितीनुसार, दोन दिवसापूर्वी ऑरेंज सिटी स्ट्रीट डेपोतून ६५, पटवर्धन मैदानातून ६५, खापरी डेपोतून ३८, कोराडी डेपोतून २६ व मातृशक्तीमधून ६ बसचे संचालन करण्यात आले.
...
सकाळ व संध्याकाळी गर्दी
कार्यालयात येण्याच्या व परत जाण्याच्या वेळेला बसमध्ये गर्दी वाढत आहे. काही मार्गावर बस संख्या वाढविण्याची नितांत गरज आहे. सकाळी व संध्याकाळच्या सुमारास बसमधील प्रवासी वाढतात. यामुळे अनेक प्रवाशांना उभे राहून प्रवास करावा लागतो. मनपाला आपल्या आदेशाचे पालन करण्यासाठी बसची संख्या वाढवावी लागेल. टप्प्याटप्प्याने बस संख्या वाढविण्यात येणार असल्याची माहिती मनपाच्या एका वरिष्ठ अधिकाऱ्यांनी दिली.
...
या मार्गावर अधिक फेऱ्या
बर्डी ते हिंगणा, बुटीबोरी, पारडी, खापरखेडा, पिपळा फाटा, डिफेन्स आदी मार्गावर अधिक बस धावत आहेत. परंतु बाजार भागातील बसची संख्या अजूनही कमी आहे. त्यात दोन बसच्या ये-जामधील अंतर अधिक आहे. दुसरीकडे बर्डी-हिंगणा ग्रामीण रुग्णालयादरम्यान १५, बर्डी-डिफेन्सदरम्यान १०,बर्डी-इंडोरमा गेटदरम्यान १५, बर्डी-खापरखेडा ११, बर्डी-ब्राम्हणी फाटा ११, पारडी-जयताळा व्हाया महालदरम्यान ९, पिपळा फाटा-हजारी पहाड दरम्यान ९ यासह अन्य काही मार्गावर बस धावत आहेत.