सुमेध वाघमारे
नागपूर : गरीब रुग्णांसाठी आशेचे किरण ठरलेल्या मेडिकललाही वीज बिलाचे चटके सहन करावे लागत आहे. विजेची मागणी सातत्याने वाढत असल्याने सौरऊर्जेचा पर्याय निवडला. परंतु, मागील तीन वर्षांपासून निधीअभावी हा प्रकल्प रखडला होता. अखेर पालकमंत्री नितीन राऊत यांनी यासाठी पुढाकार घेतल्याने आता तो पूर्णत्वाच्या मार्गावर आहे. रविवारी प्रकल्पासाठी लागणारी यंत्रसामग्री उपलब्ध झाली. यामुळे संपूर्ण मेडिकल लवकरच सौरऊर्जेने प्रकाशमान होणार आहे.
आशिया खंडातील दुसऱ्या क्रमांकाचे सर्वांत मोठे रुग्णालय म्हणून मेडिकलची ओळख आहे. रुग्णालयात केवळ विदर्भच नव्हे, तर मध्य प्रदेश, छत्तीसगड, तेलंगणा येथून रुग्ण येतात. दरवर्षी रुग्णसंख्येत वाढ होत आहे. रुग्णांना अद्ययावत उपचार मिळण्यासाठी नवे विभागही सुरू केले जात आहे. मागील पाच वर्षांत ट्रॉमा केअर सेंटर, अतिदक्षता विभागाची स्वतंत्र इमारत रुग्णसेवेत सुरू झाले. लवकरच मुलांचे वसतिगृह, कॅन्सर हॉस्पिटल, सिकलसेल सेंटर, स्पाईन सेंटर व इतरही नवीन विभागाचे बांधकाम होणार आहे. यामुळे या विभागांना मोठ्या प्रमाणात वीज लागणार आहे. सध्याच्या स्थितीत मेडिकलचे वीज बिलावर दरमहा जवळपास ८० लाख रुपये खर्च होत आहे. तो टाळण्यासाठी आणि खर्चातही बचत करण्याचा मेडिकलचा दुहेरी हेतू या सौरऊजेतून साध्य होणार आहे.
-तीन वर्षांची प्रतीक्षा संपली
मेडिकल प्रशासनाने २०१७मध्ये या प्रकल्पाचा प्रस्ताव शासनाकडे पाठविला होता. त्यावेळी ‘महाराष्ट्र ऊर्जा विकास अभिकरण’कडून सौरऊर्जा प्रकल्प उभारणीसाठी मेडिकलच्या इमारतीची पाहणी करण्यात आली होती. परंतु, पुढे निधीअभावी हा प्रकल्प थंडबस्त्यात पडला. डॉ. सुधीर गुप्ता यांच्याकडे अधिष्ठातापदाची जबाबदारी येताच त्यांनी या प्रकल्पासाठी पुढाकार घेतला. पालकमंत्री नितीन राऊत यांनी यात सहकार्य केल्याने जवळपास पाच कोटींच्या प्रकल्पाला मंजुरी मिळाली. यासाठी लागणारी यंत्रसामग्री रविवारी मेडिकलला उपलब्ध झाली.
-मेडिकलच्या इमारतीवर सौर पॅनेल
सौरऊर्जेतून वीज निर्मिती करण्यासाठी मेडिकलचा अपघात विभाग, वॉर्ड क्र. १३, १२, २८, ३२, ३३, पूर्व भागातील संपूर्ण विंग, मार्ड वसतिगृह, मुला-मुलींचे वसतिगृह, नर्सिंग होस्टेलच्यावर सौर पॅनल लावले जाणार आहे. साधारण १० हजार ३०० स्केअर मीटरवर लावण्यात येणाऱ्या या पॅनलमधून १६४८ किलो वॅट विजेची निर्मिती होणार आहे.
-सौरऊर्जेमुळे मेडिकलला मोठी मदत मिळेल
सौरऊर्जा हा स्वच्छ अपारंपरिक ऊर्जेचा स्रोत आहे. ऊर्जा बचत आणि विजेवर होणारा खर्च कमी करण्यासाठी सौरऊर्जा वरदान ठरत आहे. म्हणूनच सौरऊर्जा प्रकल्प लावण्याचा निर्णय घेण्यात आला. यात पालकमंत्री नितीन राऊत यांचे सहकार्य मिळाले. यामुळे रविवारी प्रकल्पाला लागणारी यंत्रसामग्री उपलब्ध झाली. लवकरच हा प्रकल्प कार्यान्वित होईल.
-डॉ. सुधीर गुप्ता, अधिष्ठाता, मेडिकल