लोकमत न्यूज नेटवर्क
नागपूर - कुख्यात गुन्हेगार मनीष श्रीवास याच्या हत्याकांडाशी संबंधित महत्त्वाचे धागेदोरे पोलिसांच्या हाती लागले असून कधीकाळी नागपूरच्या गुन्हेगारी जगतात प्रचंड दबदबा असलेल्या गँगस्टरचा भाऊ आणि माजी नगरसेवकासह काही जणांना पोलिसांनी शुक्रवारी चाैकशीसाठी ताब्यात घेतले. त्यामुळे लवकरच या हत्याकांडाचा खुलासा होण्याचे संकेत मिळाले आहेत.
अत्यंत क्रूर गुन्हेगार म्हणून नागपूरच नव्हे तर आजूबाजूच्या जिल्ह्यातही कुपरिचित असलेल्या मनीषची १० वर्षांपूर्वी गुन्हेगारी वर्तुळात प्रचंड दहशत होती. तो कुणाचाही गेम करण्यासाठी तयार राहायचा आणि कुणाचीही सुपारी घ्यायचा. मनीष श्रीवास २०१२ मध्ये अचानक गायब झाला. आर्थिक व्यवहारातून त्याने एका गुन्हेगाराची सुपारी घेतल्यामुळे त्याला ओल्या पार्टीत बोलवून त्याची अत्यंत क्रूर पद्धतीने हत्या करण्यात आल्याची कुजबुज काही महिन्यानंतर गुन्हेगारी वर्तुळात चर्चेला आली. मनीषला तंदूरच्या भट्टीत जाळून त्याची राख नदीत सोडल्याचीही नंतर उघड चर्चा सुरू झाली. नागपूर शहर आणि जिल्ह्यातील लहानमोठ्या सर्वच गुन्हेगारांना हे माहीत असले तरी सर्वांनीच तोंडावर झापड बांधून घेतले. विशेष म्हणजे, मनीषच्या पत्नीने २०१६ मध्ये या संबंधाने आवाज उचलला. परंतु तो आवाज संबंधित गुन्हेगारांकडून दाबण्यात आला. पोलिसांनीही फारसे गांभीर्याने लक्ष न दिल्याने हे रहस्यमय हत्याकांड पोलिसांच्या फाईलमध्ये दबले. मात्र, दोन महिन्यांपूर्वी पोलीस आयुक्त अमितेशकुमार यांनी शहरातील अनडिटेक्ट मर्डरचा उलगडा करण्यासाठी खास पथकांना कामी लावले. त्यांनी रात्रीचा दिवस करून लकडगंज, कन्हान, कामठीतून मनीषच्या हत्याकांडाचे धागेदोरे उकरुन काढले. चार दिवसांपूर्वी पोलीस आयुक्त अमितेशकुमार यांनी मनीषच्या हत्याकांडाचा उलगडा होऊ शकतोे, असा आत्मविश्वास पत्रकारांशी बोलताना व्यक्त केला. या पार्श्वभूमीवर, मंगळवार ते गुरुवार नागपूरसह, कामठी, कन्हानच्या गुंडांची पोलिसांनी झाडाझडती घेतली. अनेकांना बाजीरावची मुक्तहस्ते भेट दिल्याने त्यांनी मनीषच्या हत्याकांडाचे फिल्मीस्टाईल कथानक पोलिसांसमोर उघड केल्याचे समजते. याच माहितीच्या आधारे शुक्रवारी एका माजी नगरसेवकासह नागपुरातील सर्वात जुना (दिवंगत) गँगस्टरच्या भावाला आणि आणखी काही गुन्हेगारांना चौकशीसाठी ताब्यात घेतले. त्याच्याकडूनही या हत्याकांडावर बराचसा प्रकाश पडल्याने रहस्यमय ठरलेल्या मनीष श्रीवास हत्याकांडाचा उलगडा होण्याची शक्यता वाढली आहे.
---
कामठी- कन्हान अस्वस्थ
मनीषच्या हत्याकांडात महत्त्वाची भूमिका वठविणारे अनेक गुन्हेगार आता निर्धास्त झाले होते. मात्र, पोलीस आयुक्तांकडून या आठवड्यात अनेकांची पेशी झाल्याने कधीही पोलीस आपली मानगुट पकडू शकतात, अशी त्यांना भीती वाटत आहे. त्यामुळे लकडगंजसह कामठी कन्हानमध्येही तीव्र अस्वस्थता निर्माण झाली आहे.
---
सीपी म्हणतात... ‘वेट ॲन्ड वॉच’
या संबंधाने पोलीस आयुक्त अमितेशकुमार यांच्याशी संपर्क साधला असता त्यांनी हसत हसत महत्त्वाची माहिती मिळाल्याचे म्हटले. लवकरच या हत्याकांडाचा खुलासा होऊ शकतो, असे संकेत देत ‘वेट ॲन्ड वॉच’ची सूचक प्रतिक्रिया दिली.
---