सोशल मीडियावर फोटो व्हायरल : अल्पवयीन आरोपीचे कुकृत्य
लोकमत न्यूज नेटवर्क
नागपूर : अल्पवयीन आरोपीने शेजारची तरुणी आंघोळ करत असताना तिचा मोबाईलमध्ये व्हिडिओ बनविला. या व्हिडिओतील फोटोचे स्क्रीन शॉट घेऊन ते सोशल मीडियावर व्हायरल केले. तहसील पोलीस ठाण्याच्या हद्दीत ही खळबळजनक घटना घडली. आरोपी १७ वर्षांचा आहे. तहसील पोलीस ठाण्याच्या हद्दीत राहणारी एक २२ वर्षीय तरुणी सोमवारी सायंकाळी आंघोळ करत असताना आरोपीने तिचा लपून छपून व्हिडिओ बनविला. या व्हिडिओतील फोटोचे मोबाईलवर स्क्रीन शॉट घेऊन ते फोटो त्याने सोशल मीडियावर व्हायरल केले. हा संतापजनक प्रकार उघड झाल्यानंतर मुलीच्या चुलत भावाने तहसील पोलीस ठाण्यात तक्रार नोंदविली. पोलिसांनी लगेच धावपळ करून आरोपीला ताब्यात घेतले. पोलीस ठाण्यात आणून चौकशी केली असता आरोपी १७ वर्षाचा अर्थात अल्पवयीन असल्याचे उघड झाले. त्यामुळे पोलिसांनी विनयभंगाचा गुन्हा दाखल करून त्याला सूचनापत्र देऊन त्याच्या पालकांच्या ताब्यात दिले. दरम्यान, या घटनेमुळे परिसरात संतापाची लाट निर्माण झाली आहे.
--