उमरेड : समाजसेवेचे व्रत जोपासणाऱ्या उमरेडच्या शिवस्नेह गणेशोत्सव मंडळाने यंदा कोरोना तसेच लसीकरणाबाबतचा मौलिक संदेश देणारे ‘बाप्पा’ साकारले आहे. ‘उमरेडचा राजा’ने दिलेला हा कोरोना लसीकरणाचा संदेश भाविक निश्चितच स्वीकारतील, असा विश्वास मंडळाचे अध्यक्ष प्रशांत जयस्वाल यांनी व्यक्त केला.
नियमावलीचे पालन करीत ४ फूट उंच आकर्षक मूर्ती. बाप्पाच्या उजव्या हातात लसीकरण करा, लस सुरक्षित आहे, असा संदेश देण्यात आला आहे. शिवाय बाप्पाच्या मूर्तीमागे स्वच्छता कर्मचारी, परिचारिका, डॉक्टर, पोलीस, अधिकारी आदी कोरोनायाेद्ध्यांनाही साकारण्यात आले आहे. सोबतच मंडपाला रुग्णालयाचा ‘लूक’ देण्यात आला असून, सर्वधर्मसमभाव, मुलांची योग्य काळजी घ्या, लसीकरण करा, कोरोनाचे नियम पाळा, मास्क वापरा आदी महत्त्वपूर्ण संदेश देणारे फलकसुद्धा परिसरात लावले आहे. कोरोनाच्या विपरीत परिस्थितीत राज्याबाहेरील मजुरांना त्यांच्या गावी पोहोचविण्याची, निवास आणि भोजनाची व्यवस्था शिवस्नेहने केली. कोरोना रुग्णांसाठी दोन रुग्णवाहिका नि:शुल्क आणि अल्पदरात देत सामाजिक दायित्व जोपासले आहे.
यावेळी कोरोना महामारीबाबत जागरूकता, लसीकरण आदी बाबी आपण बाप्पाच्या माध्यमातूनच लोकांपर्यंत पोहोचवाव्या असा विचार पुढे आला आणि ही संकल्पना आकाराला आली, असे मत अक्षय खानोरकर यांनी व्यक्त केले. नीलेश इंगळे, प्रेम चांदूरकर, रितेश मने, क्षितिज खानोरकर, राहुल मने, अनुप शेंदरे, राजू ढेबुदास, गणेश मांढरे, विक्की लधवे, वैभव सहारे आदींनी सहकार्य केले.