नागपूर : कोरोनाच्या वाढत्या संसर्गामुळे जिल्ह्यात यंदा मोठा आणि तान्हा पोळा भरणार नाही, असे आदेश जिल्हाधिकारी विमला आर. यांनी जारी केले आहेत. कोरोनाच्या पार्श्वभूमीवर साध्या पद्धतीने सण साजरा करण्याचे आवाहन त्यांनी केले आहे.
पोळा सणाला ग्रामीण भागात विशेष महत्त्व असते. यानिमित्ताने या ठिकाणी यात्रा मेळाव्याचे देखील आयोजन होते. कोरोनाचा प्रादुर्भाव वाढू नये म्हणून राज्य शासनाच्या निर्देशानुसार जिल्ह्यात मोठा पोळा व तान्हा पोळा सार्वजनिकरीत्या साजरा करण्यास प्रतिबंध घालण्यात आले आहे. हे दोन्ही सण सार्वजनिकरीत्या साजरे झाल्यास कोरोनाचा संसर्ग मोठ्या प्रमाणावर होण्याची शक्यता नाकारता येत नाही. त्यामुळे प्रशासनाने मोठा पोळा व तान्हा पोळा सार्वजनिकरीत्या साजरा करण्यास प्रतिबंध घातला आहे.
हा सण घरीच साजरा करावा. बैलांच्या मिरवणुका काढण्यात येऊ नयेत. आरती, पूजा व अन्य धार्मिक कार्यक्रमात गर्दी होणार नाही. तसेच ध्वनी प्रदूषणाच्या नियमांचे पालन करावे. बैलांची पूजा करताना शारीरिक अंतर पाळणे, तोंडाला मास्क लावणे, सॅनिटायझरचा वापर करावा तसेच कोरोना विषाणू प्रादुर्भावासाठी शासनाने केलेल्या वेळोवेळी मार्गदर्शक सूचनांचे पालन करावे, असे जिल्हाधिकारी विमला आर. यांनी कळविले आहे.