बायो वेस्टमध्ये चौपट वाढ

कोरोनामुळे वाढला कचरा : दररोज निघतोय ३,५०० किलो जैविक कचरा

लोकमत न्यूज नेटवर्क

नागपूर : मार्चपासून नागपूर शहरात कोरोनाबाधितांची संख्या वाढण्यास सुरुवात झाली. एप्रिल महिन्यात यात प्रचंड वाढ झाली. यामुळे शहरातील बायोमेडिकल वेस्टमध्ये सरासरीच्या तुलनेत जवळपास चौपट वाढ झाली आहे. दोन वर्षांपूर्वी शहरात दररोज ७०० ते ९०० किलो निघणारा कचरा आता ३ हजार ५०० किलोवर गेला आहे. यात प्रामुख्याने कोरोनाबाधितांच्या कचऱ्याची भर पडल्याने, हा जैविक कचरा उचलण्याचा भावही चांगलाच वधारला आहे. एक किलो कचरा उचलण्यासाठी तब्बल १०० रुपये मोजावे लागत असल्याची माहिती आहे.

कोरोनाच्या पहिल्या लाटेत सुरुवातीला एप्रिल ते जून २०२० या कालावधीत दररोज १५ ते २० बाधित आढळत होते. पुढे जुलैपासून यात वाढ व्हायला लागली. सप्टेंबर-ऑक्टोबरच्या सुमारास हा आकडा १ हजार ५००पर्यंत पोहोचला होता. त्यानंतर पहिली लाट ओसरण्याला सुरुवात झाली, परंतु मार्च २०२१मध्ये पुन्हा दुसरी लाट आली. एप्रिल महिन्यात कोरोनाबाधितांची संख्या ७ हजारांवर गेली. कोरोना रुग्णांच्या संख्येत वाढ होण्यासोबतच जैविक कचऱ्यातही मोठ्या प्रमाणात वाढ झाली. दररोज ३ हजार ५०० किलो जैविक कचरा निघत आहे. किलोमागे १०० रुपये दर गृहित धरला, तर दररोज साडेतीन लाख रुपये रुग्णालयांना मोजावे लागत आहेत.

रुग्णांच्या शस्त्रक्रियेनंतर कॉटन, इंजेक्शन, आव्ही बॉटल, प्लास्टर, बॅण्डेज, सीरिंज, उपचार करताना वापरण्यात आलेल्या वस्तू आदींचा बायोमेडिकल वेस्टमध्ये समावेश होतो. परंतु, कोरोनामुळे यात मास्क, पीपीई किट, हातमोजे व अन्य वस्तूंची भर पडली आहे.

....

अन्य कचऱ्याचाही समावेश

हॉस्पिटलमध्ये भरती असलेल्या रुग्णांचा विचार करता, प्रत्येक रुग्णामागे ३५० ते ४०० ग्रॅम बायो वेस्ट निघणे अपेक्षित आहे, परंतु, हॉस्पिटलमध्ये कचऱ्याचे वर्गीकरण केले जात नाही. सरसकट सर्व कचरा बायो वेस्ट म्हणून टाकला जातो. यामुळेही बायो वेस्टमध्ये भर पडली आहे. यामुळे खर्चही वाढला आहे.

.....

भांडेवाडी येथे विल्हेवाट

शहरातील बायो वेस्टची विल्हेवाट लावण्याची जबाबदारी सुपर हायजेनिक डिस्पोजल कंपनीकडे सोपविण्यात आली आहे. यावर मनपाचे नियंत्रण आहे. शहरातील हॉस्पिटलमधील बायो वेस्टची भांडेवाडी डम्पिंग यार्ड येथे विल्हेवाट लावली जाते. विशिष्ट यंत्राच्या माध्यमातून यावर प्रक्रिया केली जाते, परंतु, कोरोना संक्रमणापासून येथील कर्मचाऱ्यांना विशेष खबरदारी घ्यावी लागत आहे, यावर मनपा प्रशासनाची नजर आहे.