महिनाभरात देशभरात २३३ प्रकरणे उजेडात : मोठ्या घडामोडींचे संकेत
नरेश डोंगरे ।
लोकमत न्यूज नेटवर्क
नागपूर : बनावट ॲपच्या माध्यमातून क्रिप्टो करन्सी एक्स्चेंजच्या नावाखाली शेकडो कोटींची रक्कम गिळंकृत करणाऱ्या ठगबाजांनी कोट्यवधी रुपये दहशतवाद्यांकडे वळते केल्याचा संशय आहे. हे अत्यंत संवेदनशील प्रकरण लक्षात आल्यानंतर तपास यंत्रणा सतर्क झाल्या असून लवकरच धमाकेदार कारवाई होणार असल्याची माहिती खास सूत्रांनी लोकमतला दिली आहे.
विशेष म्हणजे, विविध फसव्या ॲपच्या माध्यमातून शेकडो कोटी गोळा करणाऱ्यांपैकी काहींना उत्तराखंड पोलिसांनी ताब्यात घेतले असून, त्यात महाराष्ट्राचेही कनेक्शन असल्याचे विश्वसनीय तेवढेच खळबळजनक वृत्त नाव न छापण्याच्या अटीवर शीर्षस्थ सूत्रांनी लोकमतला सांगितले आहे.
गेल्या काही वर्षांत पॉवर बँक, ईझी कॉईन, ईझि पॉईंट, फिश प्लस, सन फॅक्ट्री नावाने अँप सोशल प्लॅटफार्मवर वेगात चालत आहेत. बहुतांश ॲप चीनमधून तयार करण्यात आले असून ॲपच्या माध्यमातून शेकडो कोटींच्या उलाढालीचा आभास निर्माण करण्यात आला आहे. हे ॲप वापरणाऱ्यांना अल्पावधीत आपली रक्कम कशी दामदुप्पट होते, ते एजंटकडून सांगितले जाते. पैशाच्या लालसेने मायाजालात अडकलेल्यांची रक्कम घेऊन क्रिप्टो करन्सी एक्सचेंजचा गोरखधंदा चालविण्यात येतो. त्यासाठी ॲप संचालित करणाऱ्या ठगबाजांनी देशातील विविध प्रांतात एजंट नेमले आहेत. त्यांच्याच माध्यमातून गुंतवणूकदारांच्या रकमेची हेराफेर केली जाते. त्यांना प्रभावित करण्यासाठी कागदोपत्री नोंद असलेल्या बनावट कंपन्यांचे शेकडो कोटींच्या उलाढालीचे मायाजालही दाखविले जाते. आपली रक्कम अनेक पटीने वाढत असल्याचा आभास होत असल्याने आणि प्रारंभी छोटीमोठी रक्कम विड्रॉल करता येत असल्याने गुंतवणूकदार या फसवणुकीच्या जाळ्यात पुरता गुंतत जातो अन् लाखोंची रक्कम ठगबाजांच्या हवाली करतो. लाखो गुंतवणूकदार अशा पद्धतीने या मोहजालात अडकवून त्यांचे शेकडो कोटी रुपये या रॅकेटने स्वत:च्या खात्यात वळते करून घेतले आहेत. यातील कोट्यवधीं रुपये दहशतवादी संघटनांशी कनेक्ट असलेल्या संशयितांकडे वळते करण्यात आल्याची माहिती आहे. सूत्रांच्या मते ठगबाजाच्या खात्यात असलेले ३०० कोटी फ्रीज करण्यात आले आहे.
---
१२ राज्यात मायाजाल
ठगबाजीच्या या गोरखधंद्याचा छडा लागल्यानंतर उत्तराखंडच्या तपास यंत्रणा गतिमान झाल्या. त्यानंतर फसवणुकीची देशभरातील २३३ प्रकरणे पुढे आली. त्यात सर्वाधिक १७८ प्रकरणे तेलांगणातील आहेत. पश्चिम बंगालमधील १९, उत्तर प्रदेश १३, हरियाणा ५, तामिळनाडू ४, कर्नाटका ३, महाराष्ट्र, छत्तीसगड, ओडिशा आणि उत्तराखंड प्रत्येकी २ (एकूण ८) आणि दिल्ली, बिहार तसेच चंदीगड मधील प्रत्येकी एका प्रकरणाचा खुलासा झाल्याची माहिती आहे.
----
विदेशी खाती अन् शेकडो सिम
अटक करण्यात आलेले आरोपी आणि बाहेर असलेल्या त्यांच्या साथीदारांनी ॲप चालविण्यासाठी, गुंतवणूकदारांकडून आलेली रक्कम स्वीकारण्यासाठी, ती विविध खात्यात वळती करण्यासाठी वेगवेगळ्या सिमकार्डचा वापर केला. त्यातील २०० वर सिमकार्डचे कनेक्शन संशयास्पद असून या सीमच्या चाैकशीतूनच विदेशी बँक खाती आणि दहशतवादी कनेक्शन उजेडात आल्याची सूत्रांची माहिती आहे.
---