योगेश पांडे
लोकमत न्यूज नेटवर्क
नागपूर : राष्ट्रसंत तुकडोजी महाराज नागपूर विद्यापीठाला ‘नॅक’चा ‘अ’ दर्जा मिळाल्यानंतर त्यातच बहुधा प्रशासन समाधानी आहे. तंत्रज्ञानाच्या युगात संकेतस्थळ हे विद्यापीठाला सर्व जगाशी जोडणारे माध्यम आहे. मात्र, ‘ऑनलाईन’ सुधारणांचे मोठमोठे दावे होत असलेल्या संकेतस्थळाकडे अधिकाऱ्यांचे साफ दुर्लक्ष होत आहे. संकेतस्थळावर अद्यापही जुनीच माहिती उपलब्ध असून, अधिष्ठात्यांची यादी बदलण्याची तसदीदेखील विद्यापीठाने घेतलेली नाही. आश्चर्याची बाब म्हणजे विद्वत परिषदेच्या अधिकृत यादीत उपकुलसचिव डॉ. अनिल हिरेखन हेच वर्तमान कुलसचिव असल्याचे दाखविण्यात येत आहे.
अनेक विद्यार्थी विभाग, प्राधिकरण, त्यातील सदस्य यांची माहिती व्हावी यासाठी संकेतस्थळाचा आधार घेतात. परंतु, नागपूर विद्यापीठाने संकेतस्थळावर अद्यापही प्राधिकरणांची यादी ‘अपडेट’ केलेली नाही. सिनेट, विद्वत्त परिषद इतकेच काय, तर व्यवस्थापन परिषदेच्या यादीत जुनीच नावे दाखविण्यात येत आहेत. मानव्यविज्ञान शाखेचे प्रभारी अधिष्ठाता डॉ. निर्मलकुमार सिंग हे निवृत्त झाले आहेत. मात्र, यादीत अद्यापही ते व्यवस्थापन परिषदेवर असल्याचे दाखविण्यात येत आहे. सोबतच भूविज्ञानशास्त्र विभागप्रमुख डॉ. कीर्तीकुमार रणदिवे यांचे व्यवस्थापन परिषदेवर कुलगुरूंनी नामनिर्देशन केले. मात्र, त्यांच्याऐवजी अद्यापही संस्कृत विभाग प्रमुख डॉ. दलाल यांचेच नाव संकेतस्थळावरील अधिकृत यादीत आहे. असाच प्रकार सिनेट व विद्वत्त परिषदेच्या यादीतदेखील झाला आहे. विद्वत्त परिषदेच्या अधिकृत यादीत डॉ. राजेश शिंगरू हेच विज्ञान व तंत्रज्ञान विद्याशाखेचे प्रभारी अधिष्ठाता असल्याचे दाखविले आहे. प्रत्यक्षात डॉ. प्रशांत माहेश्वरी हे सद्य:स्थितीत अधिष्ठाता आहेत. अधिष्ठाता मंडळाची यादीदेखील अद्यापही जुनीच आहे.
अधिकृत यादीत हिरेखनच कुलसचिव
विद्वत्त परिषदेच्या यादीत कुलसचिव म्हणून डॉ. अनिल हिरेखन यांचेच नाव दर्शविण्यात येत आहे. डॉ. राजू हिवसे यांची नियुक्ती होऊन अनेक आठवडे झाले आहेत. मात्र, तरीदेखील यादी ‘अपडेट’ करण्याची तसदी अधिकाऱ्यांनी घेतलेली नाही.
संकेतस्थळाला नवीन रूप, याद्या मात्र जुन्याच
‘ई-रिफॉर्म्स’साठी नागपूर विद्यापीठाने अनेक सकारात्मक पावले उचलली. परंतु, ‘ऑनलाईन’ सुधारणांचे मूलभूत अंग असलेल्या संकेतस्थळाचा मात्र हवा तसा विकास झालेला नाही. अनेकदा तर संकेतस्थळाच्या मराठी आवृत्तीवर प्रशासनाच्या विविध अधिसूचना, परिपत्रके वेळेवर ‘अपलोड’च होत नसल्याचे आढळून आले आहे. यासंबंधात प्रशासनाकडून संबंधित अधिकाऱ्यांना कधीही जाब विचारला जात नाही हे विशेष. काही दिवसांअगोदरच विद्यापीठाने संकेतस्थळाला नवीन स्वरूप दिले आहे. परंतु, प्रत्यक्षात असे करत असताना अनेक जुने निर्णय ‘अपलोड’च करण्यात आलेले नाही. त्यामुळे विद्यार्थ्यांना अडचण जात आहे.