नागपूर : प्रवासात आपल्या तान्हुल्याला दूध पाजताना महिलांची कुचंबणा होते. त्यासाठी एसटी महामंडळाने पाऊल उचलून बसस्थानकावर हिरकणी कक्ष स्थापन केले. नागपूरच्या मध्यवर्ती गणेशपेठ बसस्थानकावरही हा कक्ष स्थापन केला. परंतु हा कक्षच सद्यस्थितीत गायब झाल्याचे चित्र आहे. त्यामुळे प्रवासात आपल्या बाळाला दूध पाजणाऱ्या महिला प्रवाशांची कुचंबणा होत आहे.
एसटी महामंडळाने मोठा गाजावाजा करून नागपूरच्या गणेशपेठ बसस्थानकावर हिरकणी कक्ष सुरू केला. सुरुवातीला दोन वर्षे हा कक्ष सुरळीत सुरू होता. त्यानंतर या कक्षाला कुलूप लावून ठेवण्यात आले. कालांतराने या कक्षाकडे दुर्लक्ष करण्यात आले. त्यामुळे या कक्षात धूळ, अस्वच्छता पसरण्यास सुरुवात झाली. मागील तीन वर्षांपासून गणेशपेठ बसस्थानकावरील हिरकणी कक्षच गायब झाला असून त्या ठिकाणी महामंडळाने रेस्ट रूम बांधल्या आहेत. यामुळे प्रवासात आपल्या बाळाला दूध पाजताना महिला प्रवाशांची कुचंबणा होत आहे. महिलांच्या सुविधेसाठी बसस्थानकावर हिरकणी कक्ष असणे गरजेचे आहे. त्यासाठी एसटी महामंडळाने महिला प्रवाशांच्या सुविधेसाठी त्वरित हिरकणी कक्ष उपलब्ध करून देण्याची मागणी महिला प्रवासी करीत आहेत.
..................
नूतनीकरणात अडकला हिरकणी कक्ष
गणेशपेठ बसस्थानकाच्या नूतनीकरणाचे काम सुरू आहे. परंतु हे काम मागील वर्षभरापासून रखडले आहे. सुरुवातीला हिरकणी कक्ष असलेल्या ठिकाणी महामंडळाने रेस्ट रूम तयार केल्या आहेत. नूतनीकरणाच्या कामात हिरकणी कक्ष उभारण्यात येणार असल्याची माहिती अधिकाऱ्यांनी दिली. त्यासाठी नव्याने उभारण्यात आलेल्या रेस्ट रूमच्या शेजारी एक जागा ठरविण्यात येऊन पिल्लर उभारण्यात आले आहेत. परंतु प्रत्यक्षात हिरकणी कक्ष कधी सुरू होणार, याबाबत अनिश्चितता आहे.
कक्षाबाबत केला नाही प्रचार-प्रसार
हिरकणी कक्ष सुरू करताना एसटी महामंडळाने मोठा गाजावाजा केला होता. प्रसारमाध्यमात प्रसिद्धी केली होती. परंतु या महत्त्वाच्या योजनेकडे नंतर महामंडळानेच कानाडोळा केला. बसस्थानकावर स्तनदा मातांसाठी हिरकणी कक्ष उपलब्ध आहे याची साधी घोषणाही महामंडळाने ध्वनिक्षेपकावरून केली नाही. त्यामुळे बहुतांश महिलांना हिरकणी कक्ष सुरू झाल्याचीच माहिती मिळू शकली नाही. एसटी महामंडळाच्या उदासीन धोरणामुळे या कक्षाचा हवा तसा प्रचार-प्रसार होऊ शकला नाही. कालांतराने बसस्थानकावरून हा कक्षच गायब झाला आहे.
हिरकणी कक्ष लवकरच सुरू करू
‘गणेशपेठ बसस्थानकावर सध्या हिरकणी कक्ष सुरू नाही. गणेशपेठ बसस्थानकाच्या नूतनीकरणाचे काम सुरू करण्यात आले आहे. परंतु हे काम वर्षभरापासून प्रलंबित आहे. प्रवासात महिला प्रवाशांची बाळाला स्तनपान करताना होत असलेली कुचंबणा पाहता हिरकणी कक्ष त्वरित सुरू करण्यात येईल.’
-नीलेश बेलसरे, विभाग नियंत्रक, नागपूर विभाग
..............