लोकमत न्युज नेटवर्क
नागपूर : शहरातील खेळाडूंना उत्तम दर्जाच्या सोयी सुविधा मिळाव्यात या उद्देशाने शहरातील सहा विधानसभा क्षेत्रातील सहा मैदानांची पाहणी करून खेळाडूंना खेळण्यासाठी उपयुक्त मैदाने तयार करण्याचे प्रस्तावित आहे. या संदर्भात आवश्यक ती प्रशासकीय कार्यवाही तत्काळ पूर्ण करण्याचे निर्देश सोमवारी क्रीडा विशेष समितीच्या बैठकीत सभापती प्रमोद तभाने यांनी दिले. खेळाडूंना प्रोत्साहन मिळावे, सरावासाठी येत असलेल्या समस्या जाणून घेण्यासाठी उपसभापतींसोबत शहरातील विविध मैदाने आणि क्रीडासंकुलांची पाहणी करण्याचा निर्णय घेण्यात आला.
बैठकीला समितीचे उपसभापती लखन येरवार, सदस्य सर्वश्री अमर बागडे, शेषराव गोतमारे, नरेंद्र वालदे, सदस्या रूपाली ठाकूर, उपायुक्त मिलिंद मेश्राम, मनपा शिक्षणाधिकारी प्रीती मिश्रीकोटकर, क्रीडा अधिकारी पीयूष आंबुलकर, क्रीडा नियंत्रण अधिकारी नितीन भोळे आदी उपस्थित होते..
सध्या कोरोनाच्या पार्श्वभूमीवर राज्य शासनाच्या निर्देशानुसार शहरातील सर्व क्रीडा स्पर्धांचे आयोजन करण्यास बंदी आहे. मात्र खेळाडूंना सरावासाठी मुभा देण्यात आली आहे. परंतु क्रीडा स्पधार्मुळे खेळाडूंना जी प्रेरणा मिळते ती केवळ सराव करून मिळत नाही. यामुळे खेळाडूंचे खूप नुकसान होत आहे. म्हणून शहरात कमी खेळाडू असलेल्या स्पधार्चे आयोजन करण्याची परवानगी मागितली जाणार आहे. याबाबतचा प्रस्ताव तयार करण्याचे निर्देश सभापतींनी दिले.
शहरात मनपाचे ४ क्रीडासंकुल, ४ स्केटिंग रिंग आणि विभागाद्वारे संचालित ५ व्यायाम शाळा आहेत. तसेच कबड्डी, कुस्ती, आणि खो-खो या खेळांसाठी प्रत्येकी २-२ मॅट घेण्यात आल्याची माहिती क्रीडा अधिकारी पीयूष आंबुलकर यांनी दिली.
....
बैठकीतील निणंय
-विधानसभानिहाय मैदानाचे सर्व्हे करून योग्य मैदानाची निवड करणे.
-निवड केलेल्या मैदानाचा विकास आराखड्यानुसार विकास करणे.
-क्रीडा स्पर्धांना परवानगीसंदर्भात नियमावली तयार करून प्रस्ताव राज्य सरकारकडे पाठविणे.