रेवराल/खात : मौदा तालुक्यात सरपंच आणि उपसरपंचपदांच्या निवडणुकीत पाच ग्रा.पं.मध्ये कॉँग्रेस समर्थीत गटाला यश आले आहे. २ ग्रा.पं.मध्ये भाजपा समर्थीत गटाच्या सरपंच आणि उपसरपंचाची निवड झाली आहे. यात धर्मापुरी, मोरगाव, मोहाळी, पानमारा व दुधाळा ग्रामपंचायतीमध्ये काँग्रेस समर्थीत गटाच्या सरपंच, उपसरपंचांची निवड झाली आहे. सिरसोली ग्रामपंचायतीमध्ये भाजप समर्थीत गटाचे विनोद गुलाबराव कारेमोरे सरपंच तर उपसपंचपदी प्रमिला देशमुख यांची बिनविरोध निवड झाली आहे. धर्मापुरी येथे सरपंचपद हे सर्वसाधारण (महिला) संवर्गाकरिता राखीव होते. येथे सरपंचपदाच्या निवडणुकीत काँग्रेस समर्थीत गटाच्या सविता गणराज भिवगडे यांचा विजय झाला. उपसरपंचपदी शैलेंद्र (बाबा) थोटे यांची बिनविरोध निवड झाली. मोरगाव ग्रामपंचायतीचे सरपंचपद अनुसूचित जाती संवर्गासाठी राखीव आहे. येथे काँग्रेस समर्थीत गटाचे नंदलाल परसराम पाटील यांची सरपंचपदी बिनविरोध निवड झाली. उपसरपंचपदाच्या निवडणुकीत प्रवीण प्रभुदासजी नन्होरे यांना पाच तर सागर भर्रे यांना चार मते मिळाली. यात नन्होरे एका मताने विजयी झाले. मोहाळी ग्रामपंचायतीमध्ये काँग्रेस समर्थीत गटाचे रवी चंद्रभान चकोले यांची सरपंच, तर दादाराव चिंतामण तिथले यांची उपसरपंचपदी निवड करण्यात आली. पानमारा ग्रामपंचायत येथे सरपंचपदी संजय देवा बारई व उपसरपंचपदी मधुमाला मनोज ठक्कर यांची निवड करण्यात आली.
नऊसदस्यीय दुधाळा ग्रामपंचायतीच्या सरपंचपदी उमेश गंगाधर झलके, तर सुखदेव बाबुराव रोशनखेडे यांची उपसरपंचपदी निवड झाली. नरसाळा ग्रामपंचायतीमध्ये अजाब टेकाम यांची सरपंच तर सचिन राऊत यांची उपसरपंचपदी निवड करण्यात आली. काँग्रेस गटाच्या नवनिर्वाचित सरपंच व उपसरपंचांचे माजी जिल्हा परिषद अध्यक्ष सुरेश भोयर व जि.प. सभापती तापेश्वर वैद्य यांच्या हस्ते स्वागत करण्यात आले.