नागपूर : नागपुरातील डिसेंबर महिना सर्वाधिक थंडीचा असतो, हा दरवर्षीचा अनुभव आहे. मात्र यंदा दरवर्षीसारखा थंडीचा जोर दिसला नाही. २०२० च्या डिसेंबरमध्ये थंडीचा पारा फक्त पाच दिवसच १० अंशाखाली होता. २१ डिसेंबरला सर्वाधिक म्हणजे ८.४ अंश सेल्सिअस थंडी होती. तर या शतकात २०१८ मध्ये सर्वाधिक थंडीचा दिवस नोंदविला गेला होता. २९ डिसेंबर २०१८ रोजी किमान तापमान ३.५ अंश सेल्सिअस नोंदविण्यात आले होते.
हवामान खात्याने दिलेल्या माहितीनुसार, डिसेंबर महिन्यात २०२० मध्ये अनेकदा कमी दाबाचा पट्टा निर्माण झाला. त्यामुळे वातावरणात आर्द्रता राहिली. परिणामत: आकाशात ढग दाटलेले राहिले, त्यामुळे पारा खालावला नाही. हवेचा रोखही उत्तरेकडून दक्षिणेकडे असल्याने पारा खाली आला नाही.
या काळात दाखल करण्यात आलेल्या नोंदीनुसार, डिसेंबरच्या पहिल्या पंधरवड्यात१५ डिसेंबरपर्यंत रात्री पारा सामान्यापेक्षा वर राहिला. १३ डिसेंबरला कमाल तापमान १९.५ अंशावर पोहचले होते. तर १४ आणि १५ डिसेंबरला १९.४ अंश तापमानाची नोंद झाली आहे. मात्र डिसेंबरच्या दुसऱ्या पंधरवाड्यात २० तारखेपासून पारा घटायला सुरुवात झाली. २० डिसेंबरला ८.६ अंश, २१ ला ८.४, २२ ला ८.६, २३ ला ९.२ आणि २४ डिसेंबरला ९.८ अंश सेल्सिअस तापमानाची नोंद करण्यात आली. २५ डिसेंबरला पाऱ्यात वाढ झाली. या दिवशी १०.१ अंशाची नोंद झाली आहे.
सूत्रांनी दिलेल्या माहितीनुसार, दरवर्षी डिसेंबर महिन्यात १२ ते १५ दिवस कडाक्याची थंडी पडते. परंतु यंदा फक्त पाच दिवसच थंडी जाणवली. हवामान तज्ज्ञांच्या अंदाजानुसार, डिसेंबरमध्ये रेकॉर्डब्रेक थंडी पडेल, असा होरा होता. मात्र मध्य भारतामधील सर्व अंदाज चुकीचे ठरले.
...
उष्णतेत पुढे
डिसेंबर महिन्यातील ३१ दिवसांपैकी २६ दिवसरात्र तापमान सामान्यापेक्षा अधिक राहीले. १३ डिसेंबरला रात्रीचे तापमान १९.५ अंशावर पोहचले होते. तर, १० डिसेंबरला दिवसरात्रीचे तापमान १८ अंशावर होते.
...
नागपुरातील सर्वाधिक थंडीचे दिवस
दिनांकतापमान
२९ डिसेंबर २०१८ - ३.४ अं.से.
२८ डिसेंबर २०१९ - ५.१ अं.से.
२१ डिसेंबर २०२० - ८.४ अं.से.
...
दृश्यता १ किलोमीटर
नववर्षाच्या प्रारंभी दोन दिवसांपासून आकाशात ढगांनी गर्दी केली होती. ढग आणि धुक्यांमुळे शहरात दृश्यता ५०० मीटर ते १ हजार मीटर होती. तर सामान्य दिवसात ती २ ते ४ किलोमीटर असते. शनिवारी किमान तापमान सामान्यापेक्षा दोन अंशाने अधिक १३.७ अंशावर पोहचले होते. सकाळी ८.३० वाजता आर्द्रता ८२ टक्के होती. ढगांमुळे सकाळी सूर्यदर्शन स्पष्टपणे होऊ शकले नाही. मात्र सायंकाळी आर्द्रतेत घट होऊन ५० टक्के नोंदविण्यात आली.
...