जनावरांची तस्करी पकडली

उमरेड : बेकायदेशीररीत्या जनावरांना कोंबून त्यांची वाहतूक करीत असल्याचा प्रकार उमरेड पोलिसांनी उजेडात आणला. याप्रकरणी आरोपींना अटक करण्यात आली. लहान मोठी ४ गोवंश जनावरे टाटा एक्स छोटा हाथी या चार चाकी वाहनासह एकूण ३ लाख ५४ हजार रुपयांचा मुद्देमाल जप्त करण्यात आला आहे. अमित जयगुरु कोहपरे (२७, रा.सेव, ता. उमरेड) असे आरोपीचे नाव आहे. शनिवारी तालुक्यातील बाम्हणी शिवारातून गावसुत मार्गाने नागपूर येथे गोवंश जनावरे कत्तलीकरिता वाहतूक करून घेऊन जात असल्याची गोपनीय माहिती पोलिसांना मिळाली. टाटा एक्स छोटा हाथी (एमएच ४०- बीएल ६९७२) या वाहनाच्या माध्यमातून अवैधरीत्या जनावरांची वाहतूक केली जात होती. अशातच नाकाबंदी दरम्यान पोलिसांनी तपासणी केली असता सदर गोरखधंद्याचे बिंग फुटले. आरोपीच्या ताब्यातील वाहनातून ५४ हजार रुपये किमतीची ४ गोवंश जनावरे तसेच ४ लाख रुपये किंमतीचे वाहन असा एकूण ४ लाख ५४ हजार रुपयांचा मुद्देमाल पोलिसांनी जप्त केला. सदर कारवाई प्रभारी पोलीस निरीक्षक महेश भोरटेकर यांच्या मार्गदर्शनात सहायक पोलीस उपनिरीक्षक अरुण जयसिंगपुरे यांनी केली.