लाेकमत न्यूज नेटवर्क
रेवराल : महसूल विभागाच्या पथकाने कन्हान नदीकाठच्या चिरव्हा (ता. माैदा) शिवारात केलेल्या कारवाईमध्ये अवैध उपसा केलेली रेती भरण्यासाठी वापरली जात असलेली जेसीबी मशीन आणि वाहतूक करणाऱ्या दाेन टिप्परसह सहा ब्रास रेती ताब्यात घेतली. ही कारवाई शनिवारी (दि. १३) रात्री ११ वाजताच्या सुमारास करण्यात आली. ही सर्व वाहने माैदा तहसील कार्यालयाच्या आवारात जमा करण्यात आली असून, संबंधितांवर दंडात्मक कारवाई केली जाईल, अशी माहिती तहसीलदार प्रशांत सांगडे यांनी दिली.
रेती चाेरट्यांनी कन्हान नदीवरील चिरव्हा ते वढना दरम्यान नवीन घाट तयार करून तिथून काही दिवसापासून रेतीचा अवैध उपसा सुरू केला. हा रेतीसाठा चिरव्हा शिवारातील पांडुरंग निंबार्ते, रा. चिरव्हा यांच्या शेतात ठेवण्यात आल्याची माहिती काहींनी महसूल विभागाला दिली. त्यामुळे महसूल विभागाच्या पथकाने शनिवारी रात्री या घाटाची तसेच पांडुरंग निंबार्ते यांच्या शेताची पाहणी केली.
त्यांना त्या शेतात आरएजे-३-डीएक्सएसएसएच-०२८३८४१३ क्रमांकाच्या जेसीबीद्वारे एमएच-४०/वाय-०७९७ व एमएच-३६/एफ-२९९५ क्रमांकाच्या टिप्परमध्ये रेती भरली जात असल्याचे निदर्शनास आले. चाैकशीअंती ताे रेतीसाठा विना राॅयल्टी असल्याचे स्पष्ट झाले. त्यामुळे पथकाने जेसीबीसह दाेन्ही टिप्पर आणि त्यातील प्रत्येकी तीन ब्रास रेती लगेच ताब्यात घेत सर्व वाहने रेतीसह तहसील कार्यालयाच्या आवारात जमा केली.
पथकाला पाहताच जेसीबी व टिप्परचालक पळून गेले. त्यामुळे कुणालाही ताब्यात घेण्यात आले नाही. ती जेसीबी महेश खापेकर, रा. चिरव्हा व दाेन्ही टिप्पर हटवार, रा. कापसी, ता. माैदा यांच्या मालकीचे असल्याची माहिती महसूल विभागातील कर्मचाऱ्यांनी दिली. या प्रकरणात नियमानुसार दंडात्मक कारवाई केली जाणार असल्याची माहिती तहसीलदार प्रशांत सांगडे यांनी दिली.
...
रेतीतस्करांच्या हस्तकाची अरेरावी
महसूल विभागाच्या पथकाने गेल्या २० दिवसात केलेली ही तिसरी माेठी कारवाई हाेय. पहिल्या कारवाईमध्ये एक जेसीबी, दुसऱ्या कारवाईमध्ये एक जेसीबी व दोन टिप्पर आणि तिसऱ्या कारवाईमध्ये एक जेसीबी व दोन टिप्पर महसूल विभागाने पकडले. ही कारवाई टाळण्यासाठी तसेच वाहने साेडण्यासाठी रेती तस्कराच्या एका हस्तकाने तहसीलदार प्रशांत सांगडे यांच्यासाेबत अरेरावी केली तसेच राजकीय दबावाचा वापर केला, अशी माहिती महसूल विभागातील कर्मचाऱ्याने दिली. त्यामुळे ऐनवेळी पाेलिसांची मदत घेतल्याचेही त्या कर्मचाऱ्याने सांगितले.