‘हिट अ‍ॅन्ड रन’प्रकरणी कार जप्त

अनेकांना धडक मारून गंभीर जखमी करणारा आरोपी बीड (मराठवाडा) येथील रहिवासी असून, पोलिसांना अद्याप गवसला नाही.

नागपूर : अनेकांना धडक मारून गंभीर जखमी करणारा आरोपी बीड (मराठवाडा) येथील रहिवासी असून, पोलिसांना अद्याप गवसला नाही. मात्र, यशोधरानगरातील या ‘हिट अ‍ॅन्ड रन’ प्रकरणातील कार पोलिसांनी जप्त केली. सोमवारनंतर आरोपी कारचालकाचा छडा लागेल, असे पोलीस सांगत आहेत. एमएच २३ / ई ४७९० कारच्या आरोपी चालकाने शुक्रवारी रात्री ९.४५ च्या सुमारास वनदेवीनगरात अक्षरश: थरार निर्माण केला. एका पाठोपाठ अनेकांना धडक मारून कारचालकाने आठ ते नऊ जणांना गंभीर दुखापत केली. वनदेवीनगर ते मारुती शोरूम आणि नंतर पुढच्या चौकापर्यंत त्याचा हैदोस सुरू होता. संतप्त जमाव पाठलाग करीत असल्याचे पाहून आरोपीने आॅटोमोबाईल चौकाजवळ आपली कार सोडून पळ काढला. या कारमध्ये एकूण चार जण होते आणि ते दारूच्या नशेत असावेत, असा अंदाज आहे. कारचालक पळाल्यामुळे जमावाने आपला रोष कारची तोडफोड करून व्यक्त केला. या ‘हिट अ‍ॅन्ड रन’ प्रकरणात मोहम्मद ईस्माइल करामत अली (वय ५३), प्रज्वल लक्ष्मीकांत सपाटे (वय १२), सनी मुन्नालाल कालघोर (वय २२) तसेच अन्य एक गंभीर जखमी झाले होते. कारच्या क्रमांकावरून पोलीस आरोपीचा शोध घेण्याचे प्रयत्न करीत आहेत.(प्रतिनिधी)