लोकमत न्यूज नेटवर्क
नागपूर : घरातील लोक बाहेर गेल्याची संधी साधून चोरट्यांनी कपिल नगरातील एका घराचा कडीकोयंडा कुलूप तोडून आत प्रवेश करत घरातून ४ लाख २१ हजारांचे सोन्या-चांदीचे दागिने चोरून नेले. रविवारी दुपारी ही घटना उघडकीस आली. कपिल नगरातील दुर्गा मंदिराजवळच्या शिवप्रसाद लेआऊटमध्ये राहणारे अनिल रामेश्वर वाहने (वय ५०) हे घराला कुलूप लावून ६ एप्रिलच्या रात्री सहपरिवार यशोधरा नगरातील नातेवाईकांकडे गेले होते. रविवारी दुपारी २.३०च्या सुमारास ते परत आले तेव्हा त्यांना दाराचा कडीकोयंडा कुलूप तुटलेले दिसले. चोरट्यांनी घरातील सर्व साहित्य अस्ताव्यस्त करून कपाटात ठेवलेले ४ लाख २१ हजारांचे सोन्या-चांदीचे दागिने चोरून नेल्याचे स्पष्ट झाले. वाहने यांनी दिलेल्या तक्रारीवरून कपिल नगर पोलिसांनी घरफोडीचा गुन्हा दाखल केला असून, चोरट्यांचा शोध घेतला जात आहे.